Давлат раҳбари Нурсултан Назарбаев Хавфсизлик кенгашининг йиғилишини ўтказди.

Йиғилишда ташқи омилларнинг миллий хавфсизлик аҳволига таъсири ҳамда мудофаа соҳасида давлат сиёсатининг амалга оширилишига оид масалалар кўрилди. 

– Қозоғистонга таъсир қиладиган ташқи омилларнинг мавжудлиги барчамизга маълум. Шулардан Россия ва АҚШ ўртасидаги санкциявий зиддият, Хитой ва АҚШ ўртасидаги савдо ихтилофи, Суриядаги аҳвол ва яна бошқа ҳолатлар бор. Шу сабабли, биз масалаларни муҳокама қилиб, тегишли чоралар қабуллашимиз керак, – деди Қозоғистон Президенти. 

Кун тартибидаги иккинчи масала юзасидан Қуролли кучлар жорий ўқув йилидаги ҳарбий тайёргарлигининг асосий натижалари ҳамда ўтказилган ўқув машқлари, шунингдек, қўшинларнинг жанговар шайлигини оширишга қаратилган чораларнинг натижалари ҳақида Мудофаа вазири Н. Ермекбаевнинг маърузаси тингланди.

Шунингдек, йиғилиш давомида мудофаа саноати корхоналарини замонавийлаштириш ҳамда мудофаа маҳсулотларининг янги турларини ишлаб чиқариш ҳақидаги таклифлар кўриб чиқилди. 

Учрашув натижаси бўйича Нурсултан Назарбаев қатор топшириқлар берди.