Туркистондаги Есимхан номли майдонда касбий ва техник таълим муассасалари талабалари ўртасидаги “Worldskills Turkistan-2019” вилоят чемпионатининг очилиш маросими ўтди. 

Унда иштирок этган вилоят ҳокимининг ўринбосари М. Ўтарбаев жорий йилнинг Ёшлар йили деб эълон қилиниши барча йигит-қизлар учун яхши имконият эканлигини таъкидлади.

– Минтақа раҳбари Ўмирзақ Шўкеевнинг номидан барчангизни “Маънавий янгиланиш” лойиҳаси доирасида ўтаётган тадбир билан табриклайман. Бугунги кўргазмани кўриб, ҳақиқатан ҳам тайёргарликнинг яхши бўлганига кўзим етди. 2018 йилдан бошлаб Worldskills деб номланган жаҳон ҳунармандлари чемпионати Туркистон вилоятида бошланган. Замонамиз рақобатбардошликни талаб этаётганлиги боис, биз унда ўз қобилиятимизни кўрсата олишимиз зарур. Бугунги кунда мамлакатимизда техник-касбий мутахассисларни тайёрлашга улкан аҳамият берилмоқда, – деди М. Ўтарбаев.

Моҳир ҳунармандлар юртида ўтган бу анжуман ҳунармандларимизнинг сеҳрли қўллари билан яратилаётган амалий санъатимизни кўз қорачиғидай асраш, уларни келажак авлодга тўлиқ етказиш мақсадида уюштирилди.