Тулкибош туманидаги Састўбе аҳоли манзилидаги ёшларни янги ўқув йили арафасида хушхабар билан қувонтирамиз. 

Спорт куни муносабати билан ушбу қишлоқ марказида 240 ўринли “Ер Жанібек” номли сув ва соғломлаштириш спорт мажмуаси фойдаланишга топширилди.

454 млн. тенгега, давлат-хусусий ҳамкорлиги доирасида туман ҳокимлиги, вилоят жисмоний тарбия ва спорт бошқармаси  ҳамда “ТуранСпорт­Груп” МЧБ билан уч томонлама шартнома асосида қурилган ушбу иншоотда бокс, дзюдо, стол тенниси, баскетбол, эркин кураш ва спортнинг бошқа турлари билан шуғулланиш мумкин. Келувчиларнинг кийим алмаштиришлари, душ қабул қилишлари учун махсус хоналар, мураббийлар ва ҳамшираларга мўлжалланган бўлимлар ҳам замонавий жиҳозланган. 

Тантанали очилиш маросимида туман ҳокими Н. Турашбеков барчани Спорт куни билан табриклаб, минтақада спортни ривожлантириш мақсадида бажарилаётган ишларга тўхталди.

Шунингдек, тантанага ташриф буюрган Бутунжаҳон қозоқлари ҳамжамияти раисининг биринчи ўринбосари Зауитбек Турисбеков, вилоят жисмоний тарбия ва спорт бошқармаси раҳбари Бўлат Қириқбаев, СССР спорт устаси, ҚРда хизмат кўрсатган мураббий Махамбет Сапарбаев йиғилганларни қутлаб, самимий тилакларини билдиришди.

Б. Қириқбаев спорт мажмуасини қурган “ТуранСпортГруп” МЧБ етакчиси Есбўл Ауесбек­улига вилоят ҳокимлигининг Ташаккурномасини топшириб, кифтига тўн ёпди. Меҳмонлардан З. Турисбеков ва М. Сапарбаевлар мажмуа очилиши шарафига уюштирилган бокс мусобақаси ғолибларини тақдирлашди.