Президент Қасим-Жўмарт Тўқаевнинг 2020 йил 15 январдаги Фармонига кўра, Х.А. Яссавий номидаги халқаро қозоқ – турк университети алоҳида мақомга эга  бўлди. Университет 1992 йили Элбоши Н. Назарбаевнинг ташаббуси билан Қозоғистоннинг кўҳна шаҳри Туркистонда ташкил этилди ва бугунги кунда мамлакатдаги ягона халқаро университетдир. У халқаро корпоратив бошқарувнинг ягона тизимига, Ҳукуматлараро ваколатли кенгашга, Сенат ҳамда Бошқарув кенгашига эга. Таълим қозоқ, турк, рус, ва инглиз тилларида олиб борилади.

Қозоғистон Президенти Қасим-Жўмарт Тўқаев бу масалага, яъни таълим сифатини оширишга, унинг халқаро андазаларга мос бўлиши, фан ва таълимнинг интеграциясига алоҳида эътибор қаратмоқда. Бу, айниқса, олдида туркий оламнинг маданий-маънавий маркази бўлиш ҳамда вилоятнинг таълимий- илмий хаби сифатида ривожланиш вазифалари турган Туркистон шаҳри учун жуда муҳим.

Университетнинг алоҳида мақоми унга улкан академиявий ва махсус бошқарув мустақиллигини бериб, Ph.D фалсафа доктори ва соҳа бўйича доктор даражасини тайинлаш, таълим дастурларининг мазмунини аниқлаш ва алоҳида намунадаги дипломларни беришга имконият яратади.

Шунга қараб, таълим грантининг қиймати ҳам ортади. Бу профессор-ўқитувчилар таркибининг маошини ошириш ва моддий-техника таъминотини янгилашга замин яратади. Бу чораларнинг барчаси университетга илмий ва педагогик кадрларни жалб этишга, ушбу минтақанинг ривожланишига жўшқинлик бериб, унинг олдига қўйган мақсадларга етишга ижобий таъсир кўрсатади.