Ленгер шаҳрида беш қаватли 9та уй (11 000 кв. метр)нинг қурилиши якунланмоқда. Бунёдкорлик ишлари туман ҳокими Тўлеген Телғараевнинг доимий назоратида.

Туман маркази кенг кўламдаги бунёдкорлик ишлари билан қамраб олинганлиги боис, кейинги йилларда унинг мавзелари янгича қиёфа касб этиб бормоқда. Аҳоли турмуш даражаси ҳам юксалиб бормоқда.
Туманга кираверишдаги дарвоза ҳудуди тартибга келтирилиб, ободонлаштирилди. Энди бу дарвоза орқали қадам қўйган киши туманнинг йўллари, қишлоқлари, иморатлари ободлигини кўриб, туман ҳақида илк тасаввурга эга бўлади. Тумандаги вилоят ва республика аҳамиятига эга йўллар жаҳон андазаларига мос равишда таъмирланмоқда. Йўл кенгайиши баробарида пиёдалар учун ҳам бетон йулаклар ётқизилмоқда. Буларнинг барчаси ўттиз ёшга тўлаётган истиқлолимизнинг неъматларидир.
«Йўл харитаси» дастури ижросини таъминлаш борасида хонадонлар, кўчалар, маданий-маиший иншоотлар, савдо нуқталари, истироҳат боғларида ободонлаштириш, таъмирлаш тадбирлари амалга оширилди. Энг муҳими, одамлар дастур ижроси ўзлари учун аҳамиятли, зарур эканлигини чуқур англаганликлари туфайли амалий ишлар кўлами кенгайиб, сифати яхшиланаяпти.
Аҳолининг талаб-истакларини қондиришга ҳам эътибор ошириляпти. Қишлоқларда врачлик пунктлари фаолият юритмоқда. Савдо, умумий овқатланиш шохобчалари, автомобилларга ёнилғи қуйиш, уларга хизмат кўрсатиш ўринларини кенгайтириш режаланмоқда.