Вилоятимизда бугунги кунгача 695922 киши коронавирусга қарши вакцинанинг 1-компонентини олган. Вақт ўтгани сайин кўнгилли равишда вакцина олаётганлар сафи кенгаймоқда. Буни минтақавий алоқалар хизматида ўтган матбуот анжуманида жамоат саломатлиги бошқармаси раҳбарининг ўринбосари Алтин Дўсанов маълум қилди.

– Вилоят бўйича 3600 инфекциявий, 300 карантин ва 320 реанимациявий ўрин-тўшак ташкил қилинган. Хавфли касалликнинг ривожланишига қараб, уларни 5610тага етказиш мумкин. Давлат ПЗР ташхисхоналари сони 3тадан 10тага етди. Умуман, 950898 киши текширувдан ўтказилди. Сўнги кеча-кундузда 106 кишида касаллик аниқланди, – деди вилоят бош шифокорининг ўринбосари.
Вилоят бош давлат санитар шифокорининг ўринбосари Асқар Исқақов касаллик юқтирганларнинг аксариятини вакцина олмаган ёки карантин талабларига риоя қилмаган ҳолда кўпчилик тўпланадиган жойларга борганлар ташкил қилишини айтди.
– Бугунги кунда вилоятимизда хасталаниб, уй карантинига ётқизилган фуқаролар масъулиятни ҳис этмай, жамоат жойларида юргани аниқланмоқда. Масалан, 1 август кунидан буён “Ashyq” дастури ёрдамида карантин талабларини бузган 171 фуқаро аниқланса, ундан 94 нафари “қизил” мақоми билан жамоат жойларида юргани аниқланган. Карантин талабларини бузиб, фаолият юритган нуқталар ва хусусий шахсларга 4000тага яқин маъмурий баённома тўлдирилиб, 224 млн. тенге жарима солинди, – деди А. Исқақов.
Таъкидлаш жоизки, вилоят бўйича пандемия бошланганидан буён “COVID-19” хасталиги билан 12004та ҳолат рўйхатга олинган. Ундан 10252 нафари шифо топди, 64 нафари эса вафот этди.