Туркистон вилоятида болаларга нисбатан зўравонлик ҳоллари учрамоқда. Сўнгги уч йилда оилада болага зўрлик кўрсатиш бўйича 150та воқеа рўйхатга олинган. Шундай камчиликларнинг олдини олиш мақсадида “Эл эртаси – ёш авлод” дастури амалга оширилади. Буни минтақавий алоқалар хизматида ўтган брифингда Туркистон вилоятининг “Фуқаровий Альянс” жамоат бирлашмаси президенти Шарипбек Жамалбек маълум қилди.
– Болалар хавфсизлигини таъминлашга мўлжалланган бундай дастур илгари бўлмаган. Дастурнинг мақсади – ижтимоий-маданий муҳитни шакллантириш орқали болаларга нисбатан зўравонликнинг олдини олиш. “Эл эртаси – ёш авлод” лойиҳаси “Береке” ва “Туркистон вилояти ота-оналар ҳамжамияти” жамоат бирлашмалари, “Онлайн оила академияси” билан ҳамкорликда Туркистон вилоят инсон салоҳиятини ривожлантириш бошқармаси қўллови билан амалга оширилмоқда. Ушбу ташаббус амалга ошса, яхши натижа беришига ишончимиз комил, – деди Ш. Жамалбекули.
Ўз навбатида “Туркистон вилоят ота-оналар ҳамжамияти” жамоат бирлашмасининг раисаси Ақбаян Жақипова дастурга доир маъруза қилди.
– Болаларга кўрсатилган зўравонлик асорати уларнинг ҳаётига салбий таъсир кўрсатиши мумкин, яъни соғлиги, хулқ-атвори ва кейин яна такрорланадиган зўравонликка сабаб бўлади. Шунинг учун мажмуавий дастур мактабларнинг педагогик жамоалари, ўқувчилари, ота-оналар қўмиталарининг салоҳиятини орттириш орқали оила ва мактаблардаги зўравонликларнинг олдини олишга таъсир кўрсатишга йўналтирилган, – деди А. Тўлбасиқизи.