Арисда замонавий тиббиёт мажмуасининг  тамал тоши қўйилди

Келгусида шаҳар ва қишлоқ фуқаролари учун тиббий хизмат арзон ва сифатли бўлади. Арис шаҳри, Дермене қишлоқ округининг Санали аҳоли манзилида замонавий тиббий даволаш-соғломлаштириш мажмуасининг қурилиши бошланди. Умумий қиймати ярим миллиард тенгени ташкил этадиган сармоявий лойиҳа – Арис шаҳри ва «Verum» тиббиёт компаниясининг ўртасида имзоланган меморандуми доирасида амалга ошади.
Мажмуанинг тамал тошини қўйиш маросимида Арис шаҳри ҳокими Гулжан Қурманбекова ва шаҳар маслаҳати котиби Амантай Байтанаев, «Verum» МЧБ компаниялар гуруҳининг раҳбари Алишер Есмағанбетов ва маҳаллий фуқаролар иштирок этишди.
– Давлат раҳбари Қасим-Жўмарт Тўқаев жорий йилги Мактубида «Тиббиёт соҳасига сармоядорларни жалб қилиб, илғор технология ва янги тадқиқот ишларини ўзлаштиришни йўлга қўйиш керак», зарурлигини таъкидлаган эди. Демак, маблағини қишлоқ фаровонлиги учун сарфлаб, Арис шаҳрига қарашли аҳоли манзилида сифатли тиббий хизмат кўрсатаман, деган сармоядорларни биз доим қўллаб-қувватлаймиз. Натижада, аҳолининг саломатлиги мустаҳкамланиб, ҳаёт сифати яхшиланади, – деди шаҳар ҳокими Г. Қурманбекова.
Умумий майдони 4 минг квадрат метрни ташкил этадиган мажмуада дастлабки ёрдам, кундузги ва кечки стационар, соғломлаштириш маркази, институт ва коллеж талабалари учун тиббиёт базаси жойлашади. Энг муҳими, лойиҳа доирасида камида 100 нафар маҳаллий фуқаро доимий иш билан таъминланади.
Шуни таъкидлаш жоизки, бундай клиника минтақада илк мажмуалардан бири бўлади. Замонавий мажмуа фойдаланишга топширилгач, фуқаролар компьютерлик томографиядан ўтиш учун Туркистон ва Шимкентга бориб овора бўлишмайди. Шунингдек, сифатли тиббий хизматдан нафақат Арис фуқаролари, балки қўшни Ўрдабоши туманининг фуқаролари ҳам фойдалана олади.