Вилоят ҳокимининг ўринбосари Рашид Аюпов Германия Федератив Республикасининг Қозоғистон Республикасидаги Фавқулодда ва Мухтор элчиси Моника Иверсен билан учрашди. Унда икки томонлама ҳамкорлик тўғрисида фикр алмашилиб, агросаноат мажмуаси, янгиланган энергия манбалари, чиқиндини қайта ишлаш, илғор технологиялар, шунингдек, минтақада сайёҳликни ривожлантириш масалалари муҳокама қилинди.
– Туркистон шаҳрини 2050 йилгача ривожлантиришни режалаштирмоқдамиз. Шаҳарнинг тарихий, сайёҳлик марказига айланишига ишончимиз комил. Келажакда йилига 5 миллион сайёҳни қабул қилишни кўзлаганмиз. Вилоятимизда Германия билан ҳамкорликда сармоявий лойиҳалар амалга оширилган, келажакда Германиянинг ташқи савдо палатаси вакиллари билан шартномалар тузиб, илғор технологиялар соҳасида сармоявий лойиҳаларни амалга оширишни режалаганмиз, – деди Рашид Аюпов.
Учрашув якунида вилоят ҳокимининг ўринбосари меҳмонларни Туркистон вилоятининг сармоявий имкониятлари билан таништириб, германиялик тадбиркорларни иқтисодиётнинг устувор соҳаларида ҳамкорлик қилишга чақирди.