Жорий йилда футболдан Қозоғистон Премьер-лигасида илк бор иштирок этган Туркистоннинг “Туран” жамоаси мухлислар ишончини оқлаб, олий лигада ўрнини сақлаб қолди.

Яқинда туркистонлик футболчилар Ўрал шаҳрида “Ақжайиқ” жамоаси билан учрашиб, 1:1 ҳисобида дурангга эришди. Натижада, жамоанинг очкоси 25тага етиб, 12-ўриндан жой олди. “Қайсар” ва “Жетису” жамоалари эса биринчи лигага йўл олишди.
Чемпионат бошида вилоят раҳбарлари “Туран” жамоасига Премьер-лигада қолиб, иложи борича жадвалда юқори ўринларни эгаллашни топширганди. Хуллас, юкланган вазифа бажарилди.
1-лигада ўйнаётган вилоятнинг “Мақтаарал” жамоаси 43 очко билан 2-ўринни эгаллаб турибди. Қолган икки турда ижобий натижага эришса, жамоа Премьер-лигага йўлланма олади.
Хотин-қизлар футболида Туркистон вилоятининг “Томирис-Туран” жамоаси чемпионатнинг кумуш медалига сазовор бўлди.
Умуман олганда, вилоят ҳокими Ў. Шўкеев вилоятда футболни ривожлантиришга алоҳида эътибор қаратиб келмоқда. Ҳозирги кунда Туркистонда “Туран” футбол клубининг академияси қурилмоқда.