Жорий йилнинг 10 ойи давомида Туркистон вилоятига 1 миллион 300 мингдан зиёд меҳмон ташриф буюрди. Агар 2019 йили пандемияга қадар ташриф буюрувчилар сони 1 миллиондан ошса, бултур, 2020 йили пандемия даврида чекловлар туфайли Туркистон шаҳрига 300 мингдан зиёд киши ташриф буюрган. Жорий йилда “яшил ҳудудда”ги минтақага келганлар сони 5,5 баравар ошган.

2018 йилга нисбатан вилоятда 148та меҳмонхона бўлса, бугунги кунда вилоятда яна 40та меҳмонхона барпо этилмоқда. Энди 188та меҳмонхона кунига 8 минг сайёҳни қабул қилиш имкониятига эга. Шу билан бирга, янги меҳмонхоналар қурилишига сармоядорларни жалб этиш, сайёҳларнинг келишига қулай шароит яратиш ишлари юритилмоқда. 

– Жорий йил карантин чоралари енгиллатилганидан сўнг Туркистон шаҳрида қатор халқаро тадбирлар ўтди. Олти давлатнинг парламентлари вакиллари иштирокида ўтган ТуркПА сессиялари, туркийтилли давлат вакилларига мўлжалланган медиафорум шулар жумласидан, – деди вилоят раҳбари ўз сўзида. 

Таъкидлаш жоизки, вилоят туризм соҳасини узлуксиз ривожлантириш орқали 2025 йили сайёҳлар оқими ҳамда ташриф буюрувчиларнинг сонини 2,5 миллион кишига ошириш режаланмоқда.