Ўтган йили Тулкибош туманида ободонлаштириш ва кўкаламзорлаштириш борасида залворли ишлар амалга оширилди.
Туман ҳокими Нурлан Байғутнинг аҳоли олдида берган ҳисоботи чоғида фуқаролар туманда ёшлар маданий ҳордиқ чиқарадиган масканлар йўқлиги тўғрисида бир неча бор мурожаат қилишган эди. Аҳоли мурожаатини қаноатлантириш мақсадида, туман ҳокимининг бевосита ташаббуси билан туман марказида “Менинг Тулкибошим” дам олиш маскани ташкил қилиниб, “Тўнғич Президент” ва “Марказий” истироҳат боғлари таъмирланди. Маданий ҳордиқ масканларида фавворалар, болалар ўйин майдончалари ва стрит воркаутлар барпо этилди. Турли кўринишдаги тунги чироқлар эса дам олувчиларга ўзгача завқ бағишламоқда.
Ободонлаштириш ишлари туманнинг бошқа ҳудудларида ҳам амалга оширилмоқда. Аҳоли зич жойлашган Тулкибош ва Састўбе аҳоли манзилларида ҳам болалар майдончаси ва стрит воркаутлар фойдаланишга топширилди. Жабағи қишлоғининг киравериши ва Т. Рисқулов қишлоғининг шарқий дарвозасида қишлоқ номлари ёзилган равоқлар бунёд этилди. Пандемия даврида жонларини гаровга қўйиб, фидокорона меҳнат қилган шифокорларни улуғлаш мақсадида “Шифокорлар хиёбони” қад ростлаганини ҳам алоҳида таъкидлаш жоиз.