Туркистонда “Туркистон – Туркий оламнинг маънавий пойтахти” халқаро сайёҳлик танлови бевосита кўрсатувининг телевизион шакли суратга олинди.
Туркистон вилоятининг сайёҳлик бошқармаси ташаббуси билан йўлга қўйилган лойиҳада туркий тилли 5та давлатнинг санъат арбоблари иштирок этди.
Хусусан, таниқли хонанда, Қирғизистон Республикасида хизмат кўрсатган артист – Мирбек Атабеков, ўзбекистонлик актриса, хонанда ҳамда телебошловчи – Ситора Фармонова, машҳур хонандалар Амил Мамедов (Озарбайжон), Серен Узун (Туркия) ҳамда қозоқ миллий санъати тарғиботчиси Алексей Лодочников иштирок этди.
Вилоят ҳокимлиги шафелигида “Tourizm kz” телеканали уюштирган бевосита кўрсатув иштирокчилари Туркистон вилоятининг муҳим сайёҳлик масканларини автомобилларда томоша қилишди. Арслонбоб, Хожа Аҳмад Яссавий мақбараси ва қадим Саврон, Ўтрор шаҳарчаларининг тарихидан воқиф бўлдилар. Шунингдек, “Карвон сарой” мажмуаси ва Оқмачитга боришди. Вертолётда “Сайрам-Ўгем” давлат миллий табиий истироҳат боғи ва “Ақсу-Жабағли” давлат табиий қўриқхонасини саёҳат қилишди.
Ушбу кўрсатув Қозоғистон Республикасининг ташқи ва ички туризмини тарғиб қилиш, туркий тилли давлатлар ўртасидаги муносабатлар, маданий алоқаларни мустаҳкамлаш мақсадида суратга олинди.  Таниқли санъаткорлар ўз мухлислари ва томошабинларини  маънавий пойтахтга таклиф қилишди.
“Rixos” меҳмонхонасининг мажлислар залидаги матбуот анжуманида тадбир иштирокчилари таассуротлари билан ўртоқлашиб, Туркистон минтақасининг табиати ва муқаддас қадамжолари сайёҳликни ривожлантиришга қулайлигини таъкидлашди.  Санъаткорлар лойиҳа доирасида “Карвон сарой” мажмуасида катта концерт беришди. Ташкилотчилар томонидан меҳмонларга турли номинациялар бўйича мукофотлар тақдим этилди.