Туркистон вилоятида 60га яқин спорт турлари ривожланмоқда. Ўтган йил сарҳисобига кўра минтақа спортчилари 1179 медаль соҳиби бўлишди. Йил бошидан буён 94 олтин, 71 кумуш, 20 бронза медали билан тақдирланишди. Бу ҳақда брифингда вилоят жисмоний тарбия ва спорт бошқармаси раҳбари Қ. Жўлдиқараев маълум қилди.
Унинг гапларига кўра, вилоят мактабларида жисмоний тарбия дарсида шаҳмат ўйинини мукаммал ўргатиш зарур. Тафаккур ривожига ижобий таъсир кўрсатадиган бу ўйинни нафақат спорт бошқармаси, балки таълим бошқармаси ҳам қўллаб-қувватламоқда.
– Вилоят миқёсидаги спорт мактабларида соҳа тараққиётига кўнгил бўлинаётгани туфайли спортчи ўқувчиларимиз ҚР чемпионатларида умумжамоавий ҳисобда 6 марта 1-ўринга, 4 марта 2-ўринга ва 2 марта 3-ўринга сазовор бўлишди, – деди Қ. Жарилқапули.
Яқин келажакда соҳани янада ривожлантириш учун отчопар, иқтидорли болаларга мўлжалланган вилоят мактаб-интернат-коллежи, эшкак эшиш учун кўл бунёд этилиши режаланмоқда. Шунингдек, вилоят марказида Муз саройи ва теннис маркази барпо этилади, Б. Саттарханов номидаги спорт мажмуаси қайта қад ростлаб, Б. Шўлақ номидаги спорт иншооти таъмирланади.