Давлат раҳбари Қ. Тўқаевнинг жорий йил 16 мартдаги Қозоғистон халқига Мактуби кўплаб янгиликларга бой бўлди. Президент “Январь воқеалари” сабабларига атрофлича тўхталиб, эл-юрт тинчлигини бузган ва жамоат хавфсизлигига путур етказган тўқнашувлар энди ҳеч қачон такрорланмаслигини айтди.
Мактубда давлат ва ноҳукумат ташкилотларнинг ўзаро ҳамкорликдаги фаолияти, фуқаролик жамият институтларининг тизимли равишда янгиланиши зарурлиги айтилди. Ислоҳотларни тайёрлаш ва уларни жорий этишда жамоат ташкилотлари ва фаолларни жалб этиш зарурлиги таъкидланди. Барча миллий лойиҳалар очиқ муҳокама қилинади, дейилди.
Шунингдек, Мактубда айтилишича, Президент ўз ваколатларини қисқартиради ва Парламентнинг ролини кучайтиради. Бундан кейин Давлат раҳбарининг яқин қариндошлари ҳокимият ва квази-шўъбаларда раҳбарлик лавозимларида ишлай олмайдилар. Халқ ишончини қозонган депутатларга юксак масъулият юкланади. Сайловчиларга халқ ишончини оқламаган депутатларнинг мандатини қайтариб олиш ҳуқуқи жорий этилади.
Давлат раҳбари халқни якдиллик билан Янги Қозоғистонни барпо этишга чорлади. Янги Қозоғистонда авторитар сиёсий тизим эмас, балки демократик сиёсий тизим устувор бўлиши керак. Халқ ва ҳокимият орасидаги очиқ мулоқот, танқидий фикр-мулоҳазалар мавжудлиги фойдадан холи эмас, албатта.
Азалдан раҳнамосини ҳурмат қилиб, сиёсатини амалда қўллаб келган халқмиз. Бирликни мустаҳкам шиор билиб, онг-тафаккуримизга сингдириб ўсган авлодмиз. Шунинг учун бу йўлда ҳам улкан муваффақиятларга эришишимизга ишончим комил.