Самбочи Мўлдир Бейсембаева 1996 йилдан буён кураш турлари устаси эканлигини исботлаб келмоқда. У 2004 йилда Туркистон шаҳрининг “Йил одами” деб эътироф этилган. Спорт билан 4-синфдан буён шуғулланади. Салкам 26 йил ичида 7 карра мамлакат чемпиони, Қозоғистон Республикаси спорт устаси бўлди.
– 1986 йил 14 июнда Туркистон шаҳрида туғилганман. А. Байтурсинов номидаги мактабда таҳсил олдим. Самбо ва дзюдо билан 10 ёшимдан шуғулланаман. Мураббийим ва ҳаётдаги устозим – Абдусодиқ Халиллаев. 2004-2008 йиллари Х. А. Яссавий номидаги ХҚТУнинг спорт ва санъат факультетида таҳсил олдим. Спорт ривожига ҳисса қўшаётган хотин-қизлардан бириман. Муваффақиятларга эришиш учун спорт залларида тинимсиз машқ қилмоқдамиз, – деди Мўлдир Тастанбекқизи.
Бугунги кунда Мўлдир Абдисалан Нурмаханов номидаги олимпиада захиралари ихтисослаштирилган болалар ва ўсмирлар спорт мактабида ҳамда “Ноолимпия ва миллий спорт турлари бўйича олий спорт маҳорат мактаби”да мураббий.
Самбодан Туркистон вилоят ўсмир қизлар жамоаси бош мураббийи шогирдлари ҳам юксак марраларни забт этаётганини таъкидлади. Улар мамлакат ва Осиё чемпионатлари ғолиблари – Улбўлсин Адилова, Шўлпан Алтинбек, Шаҳноза Абдуқодирова, Симбат Ермекбай ва бошқалар. 20 нафарга яқин полвонни тарбиялаган М. Бейсембаева машқ давомида темир интизомни талаб қиладиган талабчан мураббий эканлигини яширмади.