Туркистон шаҳрида сайёҳликни ривожлантириш мақсадида вилоят ҳокимлиги ва «Turkistan» телеканали ташаббуси ила “Туркистонни кўргим келади!” танлови бошланди. Лойиҳанинг бош мақсади – қадимий ва навқирон Туркистонни яхшироқ танитиш. Шунингдек, Туркистон вилояти ташкил этилганига 4 йил тўлиши муносабати билан минтақанинг сайёҳлик салоҳияти ортганлигини намойиш этиш. Бу ҳақда “Turkistan Media Holding” МЧБ раҳбари Жанахмет Ағибаев маълум қилди.

Танлов уч босқичдан иборат. Саралаш босқичида иштирок этишни истаган фуқаро қайси шаҳардан эканлигини маълум қилиб, Туркистонни нима учун кўргиси келаётгани ҳақида 1 дақиқали видеоролик тайёрлаб, ўзининг Instagram саҳифасида #туркистонникўргимкелади хештеги билан пост эълон қилиши зарур. Ғолиблар baiqau.turkistan.tv сайтида томошабинларнинг овоз бериши орқали аниқланади. Шу сабабли видеосини эълон қилган иштирокчи baiqau.turkistan.tv сайтига кириб, рўйхатдан ўтиши шарт. Энг қизиқарли видеоролик тайёрлаган 5 иштирокчи Туркистонга йўлланма олади. Биринчи босқичдан ўтган 5 номзоднинг барча харажатлари ташкилотчилар томонидан қопланади.

Дастлабки саралаш босқичидан ўтган 5 киши Туркистонга келиб, саёҳат қилган жойлари тўғрисида видеоролик тайёрлайди. Ғолибларни махсус комиссия аниқлайди. 

«Туркистонни кўргим келади!» лойиҳаси «Turkistan» телеканали ва унга тегишли барча ижтимоий тармоқларда эълон қилинади.