Вилоят марказида Жетисай туманининг маданият кунлари ўтди. “Туркистон – Туркий оламнинг юраги” мавзуида ўтган туман-шаҳарларнинг маданият кунлари доирасида “Карвон сарой” сайёҳлик мажмуасида уюштирилган “Ер жаннати Жетисайнинг маънавий Туркистонга ҳадяси” байрам тадбири томошабинларга хуш кайфият бағишлади.

Бу ерда туманнинг ҳунармандчилик ҳамда мўйқалам усталари, қишлоқ хўжалиги маҳсулотлари, “Туғилган заминим, жаннатим – Жетисайим!” китоби ҳамда турли этнос вакилларининг миллий таомлар кўргазмалари уюштирилди.

Иккинчи куни “Карвон сарой” сайёҳлик мажмуасида “Болалар йили” доирасида Жетисай тумани мактаб ўқувчиларининг “Туркистон – бўлажак ёшларнинг қутлуғ макони” номли концерт дастури намойиш этилди. 

Мазкур тадбирлар шаҳарликлар ва меҳмонлар, сайёҳларга маданий-маънавий ҳордиқ тақдим этиш мақсадида уюштирилмоқда. Шунингдек, бу – туман-шаҳарлар орасидаги танлов ёки беллашув эмас. Келгуси ҳафта поёнида Сайрам туманининг маданият кунларини ўтказиш режаланган.