Нур-Султан шаҳрида дзюдодан Осиё чемпионати ниҳоясига етди. Қитъа биринчилигида 90 килограмм вазнда иштирок этган туркистонлик Дидар Хамза бронза медали учун бўлган курашда Бирлашган Араб Амирликлари дзюдочиси Арам Григорянни мағлуб этиб, терма жамоа ҳисобига яна бир медални киритди.

Дзюдо бўйича Осиё чемпионатида Қозоғистон терма жамоаси битта олтин, иккита кумуш ва бешта бронза медалини қўлга киритиб, умумжамоа ҳисобида тўртинчи ўринни эгаллади. Жорий йилги қитъа чемпионатида 17та давлат полвонлари иштирок этди.

Қозоғистон терма жамоаси ҳисобидаги олтин медаль 73 килограмм вазнда беллашган Данияр Шамшаевга тегишли. Катталар ўртасидаги қитъа чемпионатида илк бор иштирок этган Данияр барча рақибларидан устун келди. Ҳамюртимиз финалгача тўрт рақибини бир дақиқа ичида мағлубиятга учратди.

Осиё чемпионатида Абиба Абужақинова (48 кг.) ва Ислам Бўзбаев (100 кг.) – кумуш, Мағжан Шамшадин (60 кг.), Ғусман Қирғизбаев (66 кг.), Дидар Хамза (90 кг.), Нурлихан Шархан (100 кг.) ва Аруна Жангелдина (78 кг.) бронза медалига сазовор бўлди.