Туркистонда Сайрам туманининг маданият кунлари ўтмоқда

Туман ва шаҳарларнинг “Туркистон – туркий оламнинг юраги” номли маданият кунлари доирасида Сайрам туманининг маънавий-маданий карвони вилоят марказига етиб келди. Уч кунлик дастурнинг биринчи куни “Ақсу” фольклор халқ ва “Самұрық” рақс дастасининг “Ақсукентім – арайлым” концерти билан бошланди.

Сайрам тумани ҳокимининг ўринбосари Ш. Убайдуллаев, вилоят маданият бошқармасининг маданий тадбирларни ташкил этиш бўлими мудири М. Кенжетайули, мазкур бўлимнинг бош мутахассиси Е. Сартаев бошчилигида меҳмонлар дастлаб, ҳунармандчилик, китоблар кўргазмаси ҳамда қишлоқ хўжалиги ярмаркасини томоша қилишди. 

Сўнг ёш спортчилар ўз маҳоратларини намойиш этишди.

Тантанали тадбирни туман ҳокими ўринбосари Ш. Убайдуллаев очиб, барчани маданият кунлари билан табриклади. Тадбир оҳанграбо куй-қўшиқлар, турли миллат рақслари билан давом этиб, сайрамлик санъаткорлар томошабинларга кўтаринки кайфият улашди. 

Сайрам туманининг маданият кунлари уч кун давомида “Карвон сарой” сайёҳлик мажмуасида давом этади. Барча туркистонликларни байрам тадбирига чорлаймиз!