Туркистонда 15 август – Археологлар куни муносабати билан “Фараб” илмий-оммабоп кутубхонасида байрам тадбири ўтди.

Унда Туркистон вилояти ҳокимининг ўринбосари Сакен Қалқаманов, вилоят маданият бошқармаси раҳбари Азимхан Қўйлибаев, мамлакатимизда таниқли академик, археолог Бауржан Байтанаев, тадқиқотчи олимлар, музей раҳбарлари ва археология соҳасининг мутахассислари иштирок этди.

Меҳмонлар, дастлаб, учта республика ва вилоят, туман музейлари жамғармасидаги археологик қазилма ишларидан топилган қимматбаҳо буюмлар кўргазмасини томоша қилишди. 

“Давра суҳбати” билан давом этган тадбирни вилоят ҳокими ўринбосари Сакен Амангелдиули очиб, археологларни касбий байрами билан қутлади.

– Албатта, ушбу соҳада ҳал қилинмаган муаммолар бор. Вилоятимиздаги ёдгорликларни асраб-авайлашимиз, ободонлаштириб, инфратузилмасини ривожлантиришимиз ва очиқ осмон остидаги музейга айлантириш зарур. Ушбу йўналишда мутахассис сифатида сизларнинг фикрларингиз биз учун жуда муҳим, – деди Сакен Қалқаманов.

Сўнг “Археология фани: ўтмиши ва келажаги” мавзуида археолог, ҚР Миллий Фанлар академияси академиги Бауржан Байтанаев маъруза қилди. Шунингдек, тадбирда А. Марғулан номидаги археология институти директори Ақан Ўнғарули “Туркистон вилояти ҳудудидаги тарихий-маданий ёдгорликларнинг аҳволи тўғрисида”, “Ҳазрат Султон” музей-қўриқхонасининг археологик тадқиқоти” мавзуида ушбу музей директори ўринбосари Бақитжан Нурхановлар маъруза қилишди.

Ўтрор шаҳарчасида олиб борилаётган археологик тадқиқотлар юзасидан “Ўтрор” давлат археологик қўриқхона музейи директори ўринбосари Ақилбек Серик, Х. А. Яссавий номидаги ХҚТУнинг Археология илмий-тадқиқот институти директори Кўпжасар Жетибаев соҳадаги муаммолар ва амалга оширилаётган ишларга тўхталдилар.

Тадбирда археология соҳаси ривожига ҳисса қўшаётган мутахассислар махсус ташаккурномалар билан тақдирланди.