Жетисай шаҳрида «Күлпаршын” бозорида содир бўлган ёнғин оқибатларини бартараф этиш бўйича қурилган штаб йиғилиши ўтди. 

Комиссия раҳбари С. Қалқаманов, маҳаллий ҳокимлик ва ҳуқуқ-тартибот органлари вакиллари, «Күлпаршын” бозори соҳиблари иштирокида ўтган йиғилишда Жетисай шаҳрининг ҳокими М. Қадирбек юзага келган вазият ҳақида маълумот берди. 

– Бугунги кунда тахминий ҳисоб-китобларга кўра, 613 фуқаро, 1119 савдо ўрни ёнғиндан зарар кўрган. Келтирилган зарарни қоплаш учун махсус жамғарма ташкил қилинди. Ҳозир тадбиркорлар билан тегишли ишлар юритилмоқда. Уларга кўрсатиладиган ёрдам ҳақида маълумотлар берилмоқда, – деди туман ҳокими.

Вилоят полиция департаменти тергов бошқармаси раҳбари Н. Жалғасов тумандаги мавжуд аҳволга тўхталди. 

– Мазкур ҳодиса бўйича тергов бошланди. Кеча ёнғин-техникавий, суд-қурилиш таҳлиллари ўтказилди. Тезкор тергов гуруҳи ташкил этилган, – деди у. 

Бозорни тиклашга Мақтаарал, Жетисай, Келес, Сариоғоч, Чордара, Қазиғурт туманларидан махсус бригадалар келиб, ёрдам беради. Лойиҳачилар билан келишиб, бозор тархи тайёр бўлгандан сўнг, уни бир ҳафтада тиклаши зарурлиги айтилди. 

Ёнғин асоратларини бартараф этиш мақсадида 170тага яқин юк автомашинаси сафарбар этилди. Бозорнинг янги лойиҳаси тайёрланмоқда. Савдо ўринлари тадбиркорларнинг тўрт фаслда савдо қилишлари учун қулай, шунингдек, ёнғин хавфсизлиги талабларига мувофиқ қурилади. 

Бозорни жадал ишга тушириш учун унинг ҳудуди 6 шўъбага бўлинди. Ишларни Мақтаарал, Жетисай, Сариоғоч, Келес, Чордара, Қазиғурт туманларининг қурувчилари юритишмоқда.