Туркистон шаҳрига хотин-қизлар ўртасида халқаро гроссмейстер, қозоғистонлик шаҳматчи, жаҳон чемпиони Динара Садуақасова ташриф буюрди. 

Халқаро шаҳмат федерациясининг режасига мувофиқ уюштирилган сафардан кўзланган мақсад – туркистонлик ёш шаҳматчилар орасида маҳорат сабоғини ўтказиш эди.

Дастлабки учрашув “Фараб” кутубхонасида ўтди. Унда вилоят ҳокимининг ўринбосари Сакен Қалқаманов, Туркистон шаҳар ҳокимининг ўринбосари Ерлан Кузембаев иштирок этиб, жаҳон чемпионига миннатдорчилик билдирди.

– Қозоғистон шаҳматчиларининг ушбу спорт турига қўшаётган ҳиссаси беқиёс. Спортчиларимиз турли жаҳон чемпионатларида қатнашиб, давлатимизнинг нуфузини оширмоқда. Туркистонлик ёшлар мамлакатимизнинг шарафини ҳимоя қилишига ишонамиз, – деди вилоят ҳокими ўринбосари.

Динара бир вақтда 25 нафар ёш шаҳматчи билан ўйнади. Натижада у туркистонлик икки нафар ўқувчи билан дуранг натижа кўрсатди.

Сўнг Динара Садуақасова Ўқувчилар саройидаги шаҳмат тўгарагининг фаолияти билан танишди. У ерда ҳам ёш шаҳматчилар билан беллашди. Динара замонавий жиҳозланган ўқув хоналари ва ўқувчиларга яратилган шароитларга ижобий баҳо берди. Гроссмейстер ёш шогирдларига ўзининг “Шаҳмат ўйнаб ўрганайлик” китобини тақдим этди.