Вилоят ҳокими Дархан Сатибалди Қозоғистон тадбиркорларининг ҳуқуқларини муҳофаза қилиш бўйича вакил Рустам Журсинов ҳамда “Атамекен” Тадбиркорлар палатаси бошқарма раисининг  ўринбосари Ербўл Ўстемиров билан учрашди. 

Учрашувда вилоятда тадбиркорликни ривожлантириш, қўллаб-қувватлаш ҳамда бошқа масалалар муҳокама қилинди. Минтақа раҳбари корхоналар ва янги иш ўринларини очиш устувор йўналиш эканлигини алоҳида таъкидлади.

– Туркистон вилоятида ишлаб чиқариш ўринларини очиш, тадбиркорликни ривожлантириш йўлларини кўриб чиқяпмиз. Индустриал минтақаларнинг  инфратузилма масалалари ҳам ўрганилмоқда. Минтақада йирик заводлар кам. Сармоялар жалб этиш юзасидан ишлар олиб борилмоқда. Ҳозир ёшларни меҳнатга жалб этиш, уларни рағбатлантириш лойиҳаларини кучайтириш мақсадга мувофиқдир. Бу борада “Атамекен” тадбиркорлар палатаси билан  ҳамкорлик қилишга тайёрмиз, – деди Дархан Сатибалди.

Рустам Журсинов Туркистонда  кичик бизнесни ривожлантириш учун имкониятлар мавжудлигини таъкидлади.

Таъкидлаш жоизки, бугунги кунда вилоятда 170 мингдан зиёд кичик ва ўрта бизнес корхоналари фаолият юритмоқда. Жорий йилда уларнинг  сони 26,5 мингга кўпайди. Аҳолини тадбиркорликка кенг жалб қилиш,  лойиҳаларни кредитлаш ишлари давом эттирилмоқда.