Вилоят ҳокими Дархан Сатибалди раислигида ўтган девон мажлисида энергетика соҳасини ривожлантириш, тарифларни назорат қилиш, ушбу соҳадаги инфратузилмани яхшилаш масалалари муҳокама қилинди. 

Мажлисда мутасадди бошқарма раҳбарлари, «Оңтүстік Жарық Транзит» МЧБ бош директори Мурат Ибрагимов, «Энергопоток» МЧБ бош директори Айгерим Кушкумбаева, «Қозоғистон коммунал тармоқлари» МЧБ бош директори Наби Айтжанов ва бошқалар иштирок этди. 

Вилоят ҳокими сармоядорларга қулай шароитлар яратиш борасидаги ишларни жадаллаштириш масаласини кўтарди.

– Туркистон вилояти фуқаролари асосан қишлоқларда истиқомат қилади. Улар сифатли инфратузилма, электр қуввати билан таъминланиши керак. Биз эркин иқтисодий ва индустриявий минтақаларни ҳам юқори қувватли ҳамда нархи ҳамёнбоп электр қуввати билан таъминлашимиз зарур. Тарифлар масаласи ҳам мутасадди муассаса орқали мунтазам назорат қилиб борилади, – деди Дархан Сатибалди.

Вилоятдаги 831та аҳоли манзилининг 815таси марказлаштирилган электр тизимига уланган. Жорий йилда электр таъминоти иншоотларининг қурилишига 13,1 млрд. тенге ажратилиб, 40та иншоотнинг қурилиши олиб борилмоқда. 

Мажлисда табиий монополияларни созлаш қўмитасининг Туркистон вилояти бўйича департаменти раҳбари Қанат Ўралов электр энергиясига масъул компаниянинг тарифлари қонун доирасида назоратга олингани ҳамда ушбу йўналишдаги ишлар натижаси ҳақида маълумот берди.