Туркистон вилоятида балиқчиликни ривожлантириш йўналишидаги ишлар жонланмоқда.

 Вилоят ҳокими Дархан Сатибалди раислигида ўтган девон мажлисида ушбу масала муҳокама қилинди. Минтақа раҳбари балиқчиликни ривожлантириб, маҳсулдорлик ва экспорт салоҳиятини ошириш юзасидан топшириқлар берди.

– Туркистон вилояти бўйича  балиқ етиштириш режасини қайта кўриб чиқишни топшираман. Мутасадди бошқармалар балиқчилик соҳасига сармоя жалб этиш, ушбу йўналишда фаолият юритаётган тадбиркорларни  қўллаб-қувватлашни кучайтирсин. Тадбиркорларга қулай имкониятлар яратишингиз керак. Иккинчидан, балиқчилик учун ажратилган 91та сув ҳавзасини қайта текшириб, ўрганинглар. Ҳар бир туман, шаҳар, тадбиркор учун кўрсаткич белгиланиб,  унинг ижроси назорат қилиниши зарур. Агар сув ҳавзасидан унумли фойдаланилмаса, бошқа шахсларга бериш керак, – деди Дархан Сатибалди ва масъул раҳбарларга ушбу соҳани ривожлантириш борасида янги таклифлар ва сармоявий лойиҳаларни ишлаб чиқишни топширди.

Вилоят табиий захиралар ва табиатдан фойдаланишни созлаш бошқармаси раҳбари вазифасини бажарувчи Нуржан Изтилеуовнинг айтишича, “Балиқчилик соҳасини ривожлантиришнинг минтақавий дастури” тасдиқланган. Унга кўра, Туркистон вилоятида 2030 йилгача товарли балиқ етиштириш ҳажмини 20 минг тоннага етказиш режаланса, 2022 йилга режа – 6,1 минг тонна. 10 ойда бажарилгани – 5 минг тонна. Режа йил охиригача тўлиқ бажарилади, деб кутилмоқда.

2023 йили балиқчиликни субсидиялашга 500 млн. тенге ажратиш режаланган.