85 йил давомида 70 минг талабага таълим берган кўҳна даргоҳ – Жанубий Қозоғистон давлат педагогика университетининг тантанали тадбири Шимкент шаҳридаги “Туркистон” саройида ўтди.

Унда ҚР Президенти маслаҳатчиси Малик Ўтарбаев ва ҚР Илм-фан ва олий таълим вазири ўринбосари Қуаниш Ерғалиев иштирок этиб, университет жамоасини шонли сана билан қутлади. 

Тантанали йиғилишда илмий грантлар ютиб олган ёш олимлар ҳам тақдирланди. 2022 йилда уч нафар университет олими 60 миллион тенге миқдорида илмий грант олган. 

Учрашувда машҳур жамоат арбоби Мухтар Шахановга таълим муассасасининг «Фахрий профессори» унвони берилди. Абдималик Аширов, Ўналбай Аяшев, Жарилқасин Ўналбеклар университетнинг «Фахрий ректори» бўлишди.

Байрам тадбирлари доирасида «Устозга таъзим!» кичик меъморий мажмуа очилди. Шунингдек, дорилфунундаги бир аудиторияга университет битирувчиси, машҳур шоир Мухтар Шахановнинг номи берилди. Илмий Кенгаш қарори билан Мухтар Шаханов стипендияси таъсис этилди.

Шунингдек, «Замонавий педагогик таълим: дунёвийлашув ва миллий кодекс» мавзуида халқаро илмий-амалий анжуман ўтди. Умумий мажлисда Туркия, Россия ва Буюкбританиядан келган меҳмонларнинг маърузалари тингланди.