2023 йил 1 январдан Қозоғистонда давлат томонидан қўллаб-қувватлаш чора-тадбирларини белгилаш учун Оиланинг рақамли харитаси (ОРХ) ишга туширилди, дея хабар беради ҚР Меҳнат вазирлигининг матбуот хизмати.

«Харита орқали давлат органларининг маълумот базалари, аҳолининг даромади, кўчар ва кўчмас мулкнинг мавжудлиги, оила таркиби, кредитлар мавжудлиги ва бошқалар каби турли маълумотлар олиш мумкин. Бугунги кунга қадар давлат органлари ахборот тизимлари маълумотлари асосида Қозоғистоннинг 19,5 миллион фуқароси ёки 6,3 миллион оила тўғрисида маълумот ОРХга киритилган», дейилади вазирлик хабарида.

Ҳозирги вақтда ОРХ 9 турдаги нафақа ва ижтимоий тўловлар бўйича хизматларни олиш имкониятини беради:

- ҳомиладорлик ва туғиш муносабати билан даромадидан маҳрум бўлганда тўланадиган ижтимоий нафақалар;

- болани парваришлаш муносабати билан тўланадиган ижтимоий нафақалар;

- ишдан айрилганда тўланадиган ижтимоий нафақалар;

- боқувчисини йўқотган фуқароларга тўланадиган ижтимоий нафақалар; ногирон болани тарбиялаётган ота-онага (васийга) бериладиган нафақалар;

- ногиронлик бўйича нафақалар;

- кўп болали оилалар учун нафақалар;

- «Күміс алқа» ва «Алтын алқа» кўкрак нишонлари билан тақдирланган кўп болали оналарга бериладиган нафақалар;

- Манзилли ижтимоий ёрдам.