Жорий йилнинг биринчи чорагида Туркистон вилоятида макроиқтисодий кўрсаткичларнинг ижобий юксалиши қайд этилди. Саноат маҳсулотларининг кўлами 209,4 млрд. тенгега етиб, ўтган йилга нисбатан кўрсаткич 106,3 фоизни ташкил этди. Вилоят иқтисодиётига 97,2 млрд. тенге сармоя йўналтирилган. 

Вилоят ҳокимининг девон мажлисида кўрсаткичларни сифатли амалга ошириб, ички ялпи маҳсулот ва даромадлар ҳажмини ошириш борасидаги ишларни кучайтириш топширилди.

Минтақа раҳбари ободонлаштириш, санитарияга оид ишларни жонлантириш, “Қишлоқ омонати” дастурини сифатли амалга ошириш ҳамда уй-жой коммунал хўжалиги, таълим ва қишлоқ хўжалиги соҳаларини ривожлантириш масалалари борасида мутасаддиларга топшириқлар берди.

Минтақада биринчи чоракда қурилиш ишларининг ҳажми 31,5 млрд. тенгени ёки ўтган йилга нисбатан 117,9 фоизни ташкил этди. Фойдаланишга топширилган уйлар майдони 5,5 фоизга ортиб, 120,2 минг квадрат метрга етган.

Туман, шаҳарларнинг ижтимоий-иқтисодий тараққиёт суръатини таҳлил қилиш мақсадида 15та кўрсаткич бўйича рейтинг баҳолаш тизими жорий этилиб, меморандум имзоланган. 1-чорак натижаларига кўра, 14та кўрсаткич бўйича баҳолаш олиб борилди. Жами 14та кўрсаткичнинг 10таси бўйича режаланган маррага эришилди. Туман, шаҳар ҳокимликларининг рейтинги тайёрланиб, назоратга олинди.

Вилоятда 2023 йилнинг 1 апрель ҳолатига кўра маҳаллий бюджетнинг даромади 37,7 млрд. тенгени ташкил этиб, режа 120,9 фоиз бажарилиб, ўтган йилга нисбатан 6,5 млрд. тенгега ошди. Ўтган йилнинг ушбу даврига нисбатан даромад 5,0 млрд. тенгега ошган ёки ўсиш суръати 15,3 фоизни ташкил этмоқда.