Мақтаарал туманига журналистлар учун матбуот сафари уюштирилиб, улар дастлаб Азаттиқ қишлоғидаги тоза ичимли сув тармоғининг қурилиши билан танишишди. Тумандаги 69та аҳоли манзилининг 67таси марказлаштирилган ичимли сув билан таъминланган. 

Жанажўл ва Азаттиқ аҳоли манзиллари ичимли сув тармоғини янгилаш ишлари 2024 йилда ниҳоясига етади. 

Сўнг, мухбирлар Қозоғистон ССРнинг 40 йиллиги қишлоғида қурилаётган пахта толасини қайта ишлайдиган завод қурилиши билан танишдилар. Июль ойида туман ҳокими Бақит Асанов завод-фабрикалар барпо этиш бўйича вилоят делегацияси билан Хитой ва Ўзбекистон Республикасига борган эди. Шундан сўнг, мақтаараллик тадбиркор Қобил Боев қиймати 3 млрд. тенгелик пахтани қайта ишлаш заводининг қурилишини бошлаган эди. Жорий йилда ишга тушириладиган “Cotton-Мақта” МЧБ бир кеча-кундузда 600 тонна пахтани қайта ишлайди, натижада 50 киши доимий иш билан таъминланади.

Шундан сўнг, журналистлар Азамат қишлоғидаги “Нурмағанбет” деҳқон хўжалигига боришди. Хўжалик 7,5 гектар ерда пахта етиштириб, терим ишларини бошлаб юборган. Умуман олганда, мақтаараллик пахтакорлар жорий йилда 36 минг гектар ерга чигит қадашиб, ҳосил йиғишни бошлашган. 

Матбуот сафари сўнггида журналистлар Мирзакентда барпо этилган икки қаватли спорт мажмуасининг фаолияти билан танишишди.