Давлат раҳбари Қасим-Жўмарт Тўқаев Европа Иттифоқининг ташқи ишлар ва хавфсизлик сиёсати бўйича Олий вакили – Европа комиссияси вице-президенти Хосеп Боррел билан учрашди.

Суҳбат чоғида Қозоғистон Республикаси ва Европа Иттифоқи ўртасидаги ҳамкорликни ривожлантириш истиқболлари муҳокама қилинди.

Халқаро кун тартибидаги долзарб масалалар, Марказий Осиё мамлакатлари ўртасидаги минтақавий ҳамкорлик юзасидан фикр алмашилди.

Сўнгги йилларда Қозоғистон ва Европа Иттифоқи ўртасида ўзаро ишонч, ҳурмат ва умумий устуворликларга асосланган мустаҳкам муносабатлар изчил ривожланиб бормоқда. 

Қозоғистон Республикаси Бош вазири ўринбосари – Ташқи ишлар вазири Мурат Нуртилеунинг маълум қилишича, янги битим Қозоғистон ҳамда ЕИ ўртасидаги  битим икки томонлама ҳамкорликни сифат жиҳатидан муҳим босқичга кўтаришга қаратилган. Унда, асосан, сиёсий мулоқот, демократия, инсон ҳуқуқлари соҳасидаги ҳамкорлик, маданий алоқаларни илгари суриш, молиявий ва техник ҳамкорлик, сармоялар, товар ва хизматлар савдоси, шунингдек, интеллектуал мулкни ҳимоя қилиш борасидаги қоидалар назарда тутилган.

Шубҳа йўқки, ЕИ билан ҳамкорлик тўғрисидаги битим Қозоғистоннинг кўп томонлама савдо тизимига янада интеграциялашувига ёрдам беради, бозор иқтисодиёти дастакларини мустаҳкамлайди, хорижий сармоядорлар ва ишбилармон доираларнинг мамлакатга ишончи ва қизиқишини янада оширади, қолаверса, маҳаллий ишлаб чиқарувчиларга Европа Иттифоқи мамлакатлари билан савдо соҳасидаги ҳамкорлик учун янги имкониятлар эшигини очади.