Ватан ҳимоячилари куни ва Буюк Ғалабанинг 80 йиллиги муносабати билан Келес туманида «Авлодлар унутмаган Буюк Ғалаба» мавзуида тантанали тадбир ўтди.

Давлат раҳбари Қасим-Жўмарт Тўқаев миллат тақдири учун жонини фидо қилган қаҳрамонларга нисбатан ҳурмат ва миннатдорлик ҳисси абадий қадрият эканини алоҳида таъкидлаб келмоқда. Президент ташаббуси билан юртимизда фахрийларга ҳурмат кўрсатиш, уларнинг жасоратини тарғиб қилиш давлат даражасида тизимли равишда амалга оширилмоқда. Мазкур тадбир ҳам ана шу эзгу сиёсатнинг ёрқин ифодасидир.

Тадбирдан мақсад – миллат озодлиги йўлида жонини фидо этган қаҳрамонлар номини абадийлаштириш, уларнинг сўнмас жасоратини ёш авлод қалбига сингдириш ва Ватанга бўлган муҳаббатни ошириш эди.

Байрам тантанаси Келес тумани марказидаги “Ғалаба боғи”да бошланиб, унда иштирок этган туман ҳокими Жанибек Ағибаев, «AMANAT» партиясининг Келес туман бўлими ижроия котиби Ерлан Ахметов, ҚР Меҳнат ва аҳолини ижтимоий ҳимоялаш вазирлигига қарашли меҳнатни муҳофазалаш илмий-тадқиқот институтининг Туркистон вилояти ва Шимкент шаҳри филиали директори Фахриддин Қоратоев, меҳнат фахрийлари ва жамоат фаоллари «Номаълум аскар» ёдгорлигига гулчамбар қўйиб, жангчиларнинг муқаддас руҳларига эҳтиром кўрсатдилар.

Тантанали тадбир А. Кенжеев номидаги Маданият уйида давом этди. Туман ҳокими Ж. Ағибаев барчани Буюк Ғалабанинг 80 йиллиги ва Ватан ҳимоячилари куни билан табриклаб, аждодларимизнинг улуғ жасорати ва бугунги осуда кунларнинг қадрига алоҳида тўхталди. У Улуғ Ватан уруши қаҳрамонлари ва фахрийларининг сўнмас жасорати – Мангу элнинг маънавий таянчи эканини таъкидлади. Шунингдек, кекса авлоднинг бебаҳо мероси – бугунги ёш авлод учун сўнмас ибрат эканини алоҳида қайд этди.

Байрам тадбири давомида туман мактаблари ўқувчилари ҳарбий-ватанпарварлик йўналишидаги чиқишларини намойиш қилиб, қалбларни тўлқинлантирган саҳна кўринишлари ва адабий композициялар тақдим этдилар. Ҳарбий мавзудаги қўшиқлар ва саҳна кўринишлари томошабинлар қалбида ватанпарварлик ҳиссини уйғотди.

Тадбирда иштирок этган Ф. Қоратоев Буюк Ғалабанинг 80 йиллиги халқимиз учун тарихий ва тақдирий аҳамиятга эга эканини таъкидлаб, қаҳрамон аждодларимизнинг жасорати – миллий бирлик, маънавий барқарорликнинг асоси, Буюк Ғалаба байрами эса нафақат ўтмишнинг, балки бугунги тинч ҳаётимиз ва мустақиллигимизнинг мустаҳкам пойдевори эканини алоҳида таъкидлади. 

Тадбир ватанпарварлик ҳиссини мустаҳкамлашга, шунингдек, ёш авлод қалбига эл-юртимизга муҳаббат туйғусини чуқур сингдиришга улкан ҳисса қўшди.