Мамлакатимиз мустақилликка эришганидан сўнг, 1992 йил, 4 апрелда “Дўстлик байроғи” номи билан Жанубий Қозоғистон вилояти ҳокимлигининг ижтимоий-сиёсий газетаси чиқа бошлади.
Унга таниқли журналист, ўз касбининг моҳир устаси, Сайрам туманининг “Меҳнат байроғи” газетасида кўп йиллар турли масъул вазифаларда фаолият юритган серқирра инсон Собиржон Юсуфалиев бош муҳаррир этиб тайинланди.
Ҳар сафар Шимкентга тушганимда вақт топиб, таҳририятга кириб ўтардим. Шундай ташрифларимдан бирида Собиржон ака кўк муқовали китобни қўлимга тутқазди.
– Бу менинг диплом ишим, сенга ишониб топшираяпман. Қозоғистондаги ўзбек матбуоти ҳақида танишиб чиқ, вақти келиб сенга керак бўлади.
Уйга келиб, ўқиб чиқдим, ички саҳифасида “В. И. Ленин номидаги Меҳнат Қизил Байроқ орденли Тошкент давлат университети. Партия ва совет матбуоти тарихи кафедраси сиртқи бўлим студенти Юсуфалиев Собиржон. “Қозоғистонда ўзбек матбуоти тарихи” диплом иши.
Илмий раҳбар: катта ўқитувчи Т. Пидаев.
Расмий оппонент: фан доктори, профессор Г. Эрназаров, Тошкент – 1972 йил”, деб битилган экан.
Диплом иши тўртта: “Муқаддима”, “Қозоғистонда ўзбек вақтли матбуотининг ташкил топиши ва ривожланиши”, “Хотима”, “Фойдаланилган манбалар” деб номланган бўлимдан, А-4 форматда 56 бетдан иборат эди.
Мустақиллик даврида Қозоғистондаги ўзбек матбуотининг шаклланишига кўп меҳнатлари синган марҳум устоз Собиржон ака Юсуфалиевнинг диплом ишидан фойдаланган ҳолда ушбу мақолани битмоқдаман.
Муқаддима қисмида ўша даврга мос ва хос бўлган партия етакчилигида олиб борилган ишлар кўрсатилган. Қозоғистонда ўзбек матбуоти тарихининг бошланиши 1918 йилга тўғри келади. Чунки, тарихий манбалар шундан далолат беради. Босқичма-босқич айтадиган бўлсак, Қозоғистонда 1918 йилдан то мустақиллик давригача “Еттисув ишчи халқ мухбири”, “Деҳқон товуши”, “Қизилқишлоқ”, “Пахта зарбдори”, “Пахта учун”, “Стахановчи”, “Коммунизм учун”, “Қизил Туркистон”, “Коммунистик меҳнат”, “Коммунизм учун”, “Меҳнат байроғи”, газеталари нашр этилиб, келинган. Мамлакатимиздаги ўзбек матбуоти ҳақида Собиржон Юсуфалиевга қадар бирорта мақола, монография ёзилмаганди. Унинг диплом иши туфайли биз Қозоғистонда нашр этилган ўзбек тилидаги газеталар ҳақида маълумотга эга бўламиз.
Диплом ишини ёзишда у туман, вилоят газеталарининг тахламларини Алмати шаҳридаги Пушкин номидаги илмий-оммабоп кутубхона (ҳозирги Миллий кутубхона), китоб палатаси, архив жамғармаларидан, Фанлар академиясининг уйғур бўлими кутубхонасидан фойдаланганлигини таъкидлайди.
Пушкин номидаги оммабоп кутубхонада “Пахта учун” газетасининг 1938 йил январь ойидан бошлаб 1960 йилгача, “Қизил Туркистон”нинг 1962-1965 йиллардаги “Коммунистик меҳнат”нинг 1962-1965 йиллар, “Стахановчи”нинг 1952 йили, “Коммунизм учун” 1954 йил, “Пахта зарбдори”нинг 1933-1935-1936 йиллар , “Меҳнат байроғи”нинг 1962 йилдан сўнгги тахламлари сақланмоқда.
Шунингдек, диплом ишини ёзишда узоқ йиллар газеталарда ишлаган, муҳаррирлик қилган кишилар, жумладан, “Қизилқишлоқ”, “Пахта зарбдори” ва “Стахановчи” газеталари муҳаррири, кейинчалик ўлкашунослик музейининг директори бўлган Бобожон Мирзаев, 1941 йилдан “Пахта учун” газетаси муҳаррири, шу кунларда нафақадор, Қорамурт қишлоғида яшовчи Қулаҳмад Турсунов, 1945-1947 йилларда шу газетанинг муҳаррири, нафақадор, Манкент қишлоғидан Раҳмонқул Исонов, турли вақтларда муҳаррир бўлиб ишлаган, Сайрам қишлоғидан Рўзимат Жаҳонгиров, Манкент қишлоғидан Файзулла Акромов, Мақсад Алиқулов, Беловод қишлоғидан Степан Михайлович Бабенко, 1932-1931 йилларда “Пахта зарбдори”нинг Сайрам райони бўйича мухбири бўлиб ишлаган Қодирқул Мавлонов, кекса мухбирлар Эрпўлат Қўчқоров, Ўктам Сойибназаров ва бошқаларнинг берган маълумотларидан фойдаланганини қайд этади, Собиржон Юсуфалиев ўз диплом ишида.
ҚОЗОҒИСТОНДА ЎЗБЕК ДАВРИЙ МАТБУОТИНИНГ ТАШКИЛ ТОПИШИ ВА РИВОЖЛАНИШИ
Муаллиф ўз диплом ишида қуйидаги маълумотларни ҳам келтириб ўтган: 1917-1918 йилларда Совет ҳокимиятининг маҳаллий органи “Еңбекші қазақ” (ҳозир “Социалистик Қазақстан”), “Қазақ мүңі”, “Тіршілік”, “Степная правда” (ҳозирги “Казахстанская правда”) ташкил этилди. Қозоқ тилида вилоят газеталари ҳам пайдо бўлди.
Ҳокимият тепасидаги большевиклар партияси ўз сиёсатини оммага етказиш мақсадида 1918 йилнинг 12 июнида Алматида “Еттисув ишчи халқ мухбири” деган газета чиқди. Унинг муҳаррири Собиржон Шокиржонов эди.
“Мухбир” қозоқ, ўзбек, уйғур, татар ва қирғиз тилларида аралаш матн билан нашр этилиб борди. Газета маҳаллий партия, совет, хўжалик ташкилотлари амалга ошираётган тадбирларни халқ эътиборига етказиб турди. Бироқ у ахборий газета эди. У ўша пайтдаги вазифаларни амалга оширишдаги талабларга тўлиқ жавоб бера олмагани учун 1918 йил 9 декабрдаги 41-сони билан чиқишдан тўхтади.
Республикада илк бор тўлиқ ўзбек тилида чиққан газета “Деҳқон товуши”дир. Илк сони 1927 йил апрель ойида чиқарилган. Газета Сирдарё округи партия ва ижроия қўмиталарининг органи эди. Катта форматли, 4 саҳифали бўлиб, ҳафтасига икки марта чиқиб турган. Таҳририят Шимкент шаҳрида жойлашган эди. Газетага С. Рафиқов муҳаррирлик қилган.
1928 йилнинг тахминан февраль ойларида “Деҳқон товуши” газетаси ёпилди. Унинг ўрнига “Қизилқишлоқ” газетаси чиқа бошлади. Унда даставвал Маҳмуд Султонов, сўнг Бобожон Мирзаев муҳаррир бўлиб ишлади.
“Қизилқишлоқ” газетасининг ғоявий савиясини оширишда, таҳририятни малакали кадрлар билан бутлашда 1932 йили 25 февралда бўлиб ўтган туман газеталари муҳаррирлари 1-съездининг бирлашган мажлиси катта дастур бўлди.
1930-1931 йилларда округлар тугатилди. Ҳудудлар туманларга бўлинди. 1932 йилнинг январидан бошлаб Сирдарё округи Жанубий Қозоғистон вилояти деб атала бошлади.
1932 йил май ойидан бошлаб Жанубий Қозоғистон вилоят партия қўмитаси, вилоят ижроия қўмитаси, вилоят касаба уюшмалари кенгаши ҳамда Чимкент шаҳар партия қўмитаси ва шаҳар кенгашининг органи сифатида “Пахта зарбдори” газетасининг чиқарилиши муносабати билан “Қизилқишлоқ” газетаси ёпилди. “Пахта зарбдори”га дастлаб Сайфиддин Муҳиддинов муҳаррирлик қилди.
1932 йил май ойидан бошлаб “Пахта зарбдори” 1935 йил апрель охиригача Сайрам туман партия қўмитаси, туман ижроия қўмитаси ва туман касаба уюшмалари кенгашининг ҳам органи бўлиб чиқди.
Газета ҳозирги туман газеталари ҳажмида тўрт саҳифали бўлиб, 2983 нусхада, ҳафтасига икки марта чоп этиларди.
Газетанинг сўнгги сони 1936 йил 23 март куни чиқди. Шу сондаги “Ҳамма муштарийларимиз диққатига” деган эълонда таҳририят “Пахта зарбдори”нинг 28 мартдан эътиборан Чимкент шаҳрида чиқишдан тўхтатилиб, ўша ном, форматда туман газетаси сифатида Бўстонлиқ туманининг маркази – Ғазалкент қишлоғида чиқишини газетхонларга хабар қилади. Жанубий Қозоғистон вилоятида алоҳида туман газетаси илк бор Сайрам туманида ташкил этилди. Газета 1935 йилнинг апрель ойи охирларида “Пахта зарбдори”дан ажралиб чиқиб, Сайрам туман МТС сиёсий бўлимининг органи сифатида “Пахта учун” номи билан Манкент қишлоғида нашр этила бошлади. Газетани ташкил этишда партия ходими Файзулла Ҳидоятхонов, “Пахта зарбдори”нинг муҳаррири Бобожон Мирзаевлар жонбозлик кўрсатишади.
Шундай қилиб, Жанубий Қозоғистон вилоятида ўзбек тилида чиқадиган газета иккита бўлди.
1936 йилга келиб “Пахта учун” МТС сиёсий бўлимининг органидан туман партия қўмитаси ва меҳнаткашлар депутатлари туман кенгашининг ихтиёрига ўтказилди.
“Пахта учун” газетаси ташкил этилган дастлабки йилларда Зуҳра Алимова, Диёр Дониёровлар муҳаррир бўлиб ишлашган.
Газета Улуғ Ватан урушига қадар ҳафтада икки марта чиқиб турган.
1938-1941 йиллар муҳаррирлар тез-тез ўзгариб турган. О. Холдоров, Т. Жаҳонгиров, М. Раҳимжонов, Қ. Сотибеков, Х. Солметов, Х. Хўжанов, Қ. Турсунов, Б. Эрматовлар муҳаррирлик қилишган. Газета адади 2750 нусхага етганди.
Улуғ Ватан уруши даврига келиб, кадрларнинг фронтга кетиши, қоғоз-бўёқ танқислиги туфайли газета ҳажми ўзгариб, варақа тарзида чиқа бошлади. Газетага 1942-1947 йиллар мобайнида Ҳ. Эшонқулов, Х. Хўжанов, Р. Исоновлар муҳаррирлик қилишди.
Газетанинг етакчи мавзуси “Ҳамма нарса фронт учун – ҳамма нарса ғалаба учун” шиори бўлиб, бутун куч ва имкониятлар, барча воситаларни фронтга сафарбар этиш эди.
“Пахта учун” газетасига 1948-1951 йиллар мобайнида Мақсад Алиқулов, 1952-1957 йилларда Файзулла Акромов, 1958 йилдан 1962 йилгача яна М. Алиқулов муҳаррирлик қилди.
Газета 1959 йилдан эътиборан тўрт саҳифали бўлди. Туман газетаси адади йил сайин ўсиб борди. 1962 йилда 5200 нусхани ташкил этди. Юқорида тилга олиб ўтилган газеталар уруш йилларигача лотин имлосида чоп этилган.
1962 йилга келиб газета Чимкент вилоят партия қўмитаси ва вилоят кенгаши ижроқўмининг органи, бир йилдан сўнг 1965 йилгача Чимкент вилоят партия қўмитаси ва меҳнаткашлар депутатлари вилоят кенгашининг Чимкент колхоз-совхозлар ишлаб чиқариш бошқармасининг газетаси бўлиб чиқа бошлади. 1965 йилдан то мустақиллик давригача яна Сайрам туман партия қўмитаси ва меҳнаткашлар депутатлари туман кенгашининг органи бўлиб чиқди. 1962 йил 1 майдан бошлаб “Пахта учун” номи “Меҳнат байроғи”га ўзгартирилди. Газета уч тилда чиқа бошлади. Муҳаррир этиб С. М. Бабенко тайинланди.
Туркистон туманида илк бор ўзбек тилидаги газета 1956 йил 1 майда чиқди. Ҳафтада икки марта чиқадиган, адади 2075 нусхадан иборат бўлган Туркистон туман партия қўмитаси ва туман ижроия қўмитасининг органи “Қизил Туркистон” газетаси эди. Муҳаррир А. Абдусатторов. Шу даврда 1930 йилда ташкил этилган қозоқ тилидаги “Қизил Туркистон” газетаси чоп этиларди.
1962 йилга келиб газетанинг номи “Коммунистик меҳнат” деб атала бошлади. 3000 нусхада чиқиб турди.
Хулоса қилиб айтадиган бўлсак, “Еттисув ишчи халқ мухбири”, “Деҳқон товуши”, “Қизил қишлоқ”, “Пахта зарбдори”, “Пахта учун”, “Стахановчи”, “Коммунизм учун”, “Қизил Туркистон”, “Коммунистик меҳнат” ва “Меҳнат байроғи” социализм тузимининг турли даврларида олиб борилган сиёсий-иқтисодий, ҳудудий ўзгаришлар туфайли номлари ўзгариб борса-да, аслида айни пайтда кенг ўқувчи оммасига Элбошимизнинг, давлатимизнинг ҳар томонлама олиб бораётган изчил сиёсатини етказаётган “Сайрам садоси”, “Туркистон”, “Жанубий Қозоғистон” газеталари уларнинг ворисларидир.
Мана, юз йилдан бери Қозоғистондаги ўзбек матбуоти ҳам жамиятимизда рўй бераётган сиёсий-иқтисодий, маданий-маънавий ҳаётимизни акс эттириб, аҳолининг турмуш тарзи янада яхшиланишига, жамиятимизнинг ҳар томонлама ривожланишига ўзининг муносиб ҳиссасини қўшиб келмоқда. Матбуотчилар биргаликда жамоат ташкилотлари кўмагида ушбу шонли санани муносиб нишонлашади, деб ўйлайман. Зеро Элбошимизнинг “Маънавий янгиланиш” дастури ҳам айнан маънавий бойликларимизни асраб-авайлаб, келажак авлодга етказишни кўзда тутади.
Бир асрлик тўй муборак бўлсин, азиз ўзбекзабон нашрлар ходимлари!