Туркистон вилояти туман ва шаҳарларнинг 2024 йилнинг биринчи чорагидаги ижтимоий-иқтисодий тараққиёти бўйича рейтинги эълон қилинди. Шу билан бирга, турли йўналишлар бўйича кўрсаткичлар аниқланиб, натижалар ҳақида маълумот берилди. Вилоят ҳокими Дархан Сатибалди бу борадаги ишларни кучайтириш юзасидан кўрсатмалар берди. 

Вилоят иқтисодиёт ва бюджетни режалаштириш бошқармаси раҳбари Қанат Қайипбекнинг таъкидлашича, 2024 йил январь-март ойлари якунлари бўйича минтақа ижтимоий-иқтисодий тараққиётининг асосий йўналишларида ижобий жўшқинлик сақланиб қолган. Умумий рейтингда 37 кўрсаткичга эришиш режаланган. Ҳисобот даврида саноат маҳсулотлари ишлаб чиқариш ҳажми 226,1 млрд. тенге миқдорида режаланган, амалда бу рақам 274,3 млрд. тенгени ташкил этди. Ҳисобот даврида ишлаб чиқариш саноатида маҳсулот ишлаб чиқариш ҳажмини 103,3 млрд. тенгега етказиш кўзда тутилган бўлса, амалда 122,5 млрд. тенге маҳсулот ишлаб чиқарилиб, аниқ ҳажм индекси 114,8 фоизни ташкил қилди. Қишлоқ хўжалигида маҳсулот ҳажмини 122, 5 млрд. тенгега етказиш жоиз бўлса, аниқ ҳажм индекси 128,8 млрд. тенгени ташкил этиб, режа ортиғи билан бажарилган. Асосий капиталга йўналтирилган сармоянинг 1-чорагидаги режаси 105,5 млрд. тенге бўлиб, 132,3 млрд. тенге жалб этилиб, бу режа ҳам ортиғи билан уддаланди.

Умумий рейтингни баҳолаш натижасида Саврон, Кентов, Сайрам туманлари ҳамда Туркистон ҳокимликлари етакчилик қилмоқда.