Кеча Ҳайфа шаҳрида буюк файласуф Абу Носир ал-Форобий таваллудининг 1150 йиллигига бағишланган ёдгорлик очилди, деб хабар берди Қозоғистон Ташқи ишлар вазирлигининг матбуот хизмати.

Қозоғистоннинг Исроилдаги элчиси Сатибалди Буршақов йиғилганларга ал-Форобийнинг буюк мероси ва унинг фалсафа, тиббиёт, ҳуқуқ, руҳшунослик, космология ва бошқа соҳалар ривожига қўшган ҳиссаси ҳақида сўзлаб берди. Шунингдек, С. Буршақов ёдгорликнинг очилиши икки мамлакат ўртасидаги маданий алоқаларни янада мустаҳкамлашга ёрдам беришини таъкидлади. 

Тадбирдан сўнг элчи С. Буршақов Ҳайфа мэри Эйнат Калиш-Ротем билан учрашиб, Ҳайфа ва Қозоғистон шаҳарлари ўртасида биродарлик муносабатларини ўрнатишга келишиб олишди. 

Тадбирда шаҳар маъмурияти вакиллари, дипломатик корпус ва илмий гуруҳлар, Ҳайфада таҳсил олаётган қозоғистонлик талабалар иштирок этишди. 

Ҳайфадаги араблар кварталида жойлашган Ал-Форобий кўчасига буюк файласуфнинг номи 1960 йилда берилган. У машҳур Баҳай боғлари ва Ҳайфа санъат музейи яқинидаги тарихий ҳудудда жойлашган. Унинг узунлиги 1,5 км.