Вилоятимизда 2 140 926 одам истиқомат қилади. Унинг 654 минг нафари 14-35 ёш оралиғидаги ёшлардан иборат. Улардан 150 мингдан зиёди шаҳар ёшлари бўлса, 500 мингга яқини қишлоқларда истиқомат қилишади.

Уларнинг сифатли таълим олиши ҳамда доимий иш билан таъминланиши муҳим. Куни кеча вилоят ҳокими Дархан Сатибалди раислигида ўтган девон мажлисида минтақадаги ёшлар сиёсати, йигит-қизларни қўллаб-қувватлаш масаласи муҳокама қилинди.

Тадбирда вилоят ижтимоий тараққиёт бошқармасининг раҳбари Ерлан Кузембаев маъруза қилди. Унинг айтишича, давлат дастурлари доирасида ўтган йили 310 309 йигит-қизга, жорий йилнинг икки ойида 41 331 фуқарога маслаҳат берилган. Натижада “Серпін-2050” дастурига кўра, мингга яқин йигит-қиз ўқишга қабул қилинган. Мамлакатимизнинг шимоли ва марказида жойлашган олий ўқув юртларида тегишли музокаралар олиб борилган. Дастур доирасида бултурги ўқув йилида Сайрам, Келес ва Жетисай туманидан ёшлар ушбу дастурга жалб этилган. 

Минтақада ҳарбий хизматга чақирилувчилар сони ортиб бормоқда. Вилоят бўйича 122 нафар кўнгиллилар ташкилотлари фаолият юритмоқда, уларнинг 8366 нафар аъзоси фаол.