Бу ҳақда вилоят сайёҳлик бошқармаси раҳбари вазифасини вақтинча бажарувчи Нурдаулет Медеуов брифингда маълум қилди.

Жорий йил вилоятда Наврўз байрами 10 кун нишонланади. Тадбирлар 11 март куни бошланди. Ҳар бир кунга алоҳида аҳамият берилиб, турли челленжлар, шанбаликлар, югуриш марафонлари, концерт дастурлари ўтказилади. Шунингдек, миллий таом ва ҳунармандчилик маҳсулотлари кўргазмалари, турли кўрик-танлов ҳамда миллий спорт турлари бўйича мусобақалар, хайрия тадбирларини ўтказиш режаланган.

Наврўз байрами арафасида “Карвон сарой” сайёҳлик мажмуасида сайёҳлик мавсумининг очилиши ўтди.

– Туркистон – қозоқ халқи, қолаверса, туркий халқларнинг тарихий пойтахти. Улуғ айём арафасида вилоят марказида ҳам қатор тадбирлар ўтказиш режаланган. “Карвон сарой” мажмуасида сайёҳлик мавсумининг расмий очилиш маросимида концерт дастурлари, спорт мусобақалари, интерфаол савол-жавоб, қизиқарли ўйинлар ташкил этилмоқда, – деди Нурдаулет Данабайули.

Шунингдек, вилоят марказида “Тойқозон” гастрофестивали, “Этнофестиваль”, “Жонли дарслар” сайр дастурини ўтказиш режаланган.

Жорий йилнинг 15-16 апрель кунлари “Маънавият масканида никоҳ” маросими, 24-28 май кунлари эса “Туркистонни кўргим келади” шоу-дастури ўтади. 3 июнда “Чоға” чўмилиш мавсумининг очилиш ҳафталиги, 8 июлда эса Байжансайда “Аirsoft” страйкбол чемпионати ташкил этилади. 

Шунингдек, 19 август куни Чордара туманида “Qauyn Fest” фестивали, октябрь-ноябрь ойларида Ўзбекистон, Қатар, Франция, Япония, Туркияда ўтадиган халқаро кўргазмаларда вилоятнинг сайёҳлик салоҳияти намойиш этилади.