Наврўз байрами арафасида Тўлебий тумани маркази Ленгер шаҳрида 120 хонадонли кўп қаватли уй фойдаланишга топширилди. Лойиҳанинг қиймати 2,1 миллиард тенге, уйнинг умумий майдони 7877,4 квадрат метрни ташкил этади. 

Тантанали тадбирда туман ҳокими Еркеғали Алимқулов сўзга чиқиб, янги уй соҳибларини самимий табриклади ва уларга янги хонадон калитларини топширди. 

Таъкидлаш жоизки, туманда аҳоли турмуш тарзини яхшилаш, ижтимоий ҳимоя қилиш, инсонлар яшаши учун қулай шароит яратиш борасида сўнгги йилларда давлат дастурлари асосида мисли кўрилмаган, тарихий ишлар амалга оширилди. Хусусан, уй-жойлар қурилиши бўйича аҳолининг уй-жойга муҳтож қатлами учун 23та кўп қаватли уй қурилиб, бунинг натижасида 1000га яқин оила уй-жойга эга бўлди. Айни пайтда ҳудудда 5 мингдан ортиқ фуқаро уй-жой навбатига рўйхатга олинган.

Бундан ташқари, йил охиригача яна учта кўп қаватли уй қурилиши якунлангач, 156 оилага янги хонадон калитлари топширилади.

Бундан ташқари, шаҳарнинг бош режасига мувофиқ, 11,2 гектар ер майдонида савдо ва маиший хизмат кўрсатиш иншоотлари, болалар ўйингоҳлари, спорт майдончалари, умумий овқатланиш шохобчалари, шунингдек, замонавий истироҳат боғи ташкил қилинади.