Ўзбекистон ва Қозоғистон ўртасида сайёҳликни ривожлантириш мақсадида Ўзбекистондан Туризм вазирининг ахборот сиёсати бўйича маслаҳатчиси Лола Раҳмонбоева, Туризм вазирлиги матбуот хизмати бош мутахассиси Умарбек Эсонмуродов, “Ипак йўли” халқаро туризм университети проректори Шаҳриёр Нуруллаев, машҳур блогерлар, bugun.uz, nova24.uz, qalampir.uz нашриёт вакиллари, “Sevimli”, “DunyoBo’ylab”, “UzReport” телеканаллари вакиллари ва делегациянинг бошқа аъзолари Туркистон вилоятига ташриф буюришди. 

Улар Туркистон шаҳри тарихи билан танишиб, Аҳмад Яссавий мақбарасини зиёрат қилишди. Сўнг қадимий Саврон шаҳридаги қадимий иншоотлар билан танишишди. Улар шунингдек, Қарноқ қишлоғидаги Қутайба ибн Муслим Бохилий мақбарасини зиёрат қилишди. 

Делегацияни Қарноқ қишлоқ ўзбек этномаданият бирлашмаси раиси Бекзод Ҳабибов ва Қарноқ қишлоқ Ёшлар кенгаши раиси Достон Абдалиев қарши олишди, зиёратгоҳ билан таништириб, у ердаги 1300 йиллик тут дарахтини кўздан кечиришди. Шундан сўнг делегация аъзолари қишлоқдаги янги қурилган уч минг ўринли масжидга ҳам ташриф буюришди, қишлоқ аҳолисининг бирлиги, бажарган савобли иши делегация аъзоларида юқори таассурот қолдирди.

Меҳмонларимиз Кентов шаҳридаги «Кўк байроқ» майдонига, Кентов шаҳар ёшлар маркази ва ёшлар хиёбонига ташриф буюришди.