Туркистон шаҳрида қизғин олиб борилаётган ободонлаштириш ва қурилиш ишлари вилоят ҳокими Дархан Сатибалдининг бевосита назоратида. Вилоят раҳбари раислигида ўтган мажлисда барпо этилаётган иншоотларнинг меъморчилиги ва янги лойиҳалар тақдим этилди.

Маъмурий-тадбиркорлик маркази ва Маданий-маънавият марказида барпо этилаётган янги иншоотларнинг намуналари муҳокама қилинди.

– Туркистон шаҳрида қурилаётган бинолар сайёҳларни ўзига жалб этадиган бетакрор услубда бўлиши керак. Ҳунармандлар устахонаси жойлашган сайёҳлик мажмуаси минораларида Арпаўзен тимсоллари – петроглифлар тасвирланиши керак, – деди Дархан Сатибалди.

Ушбу мажмуанинг мақсади – нафақат сайёҳларни жалб қилиш, тадбиркорликни ривожлантириш, балки бой  маданий меросимизни сақлаб қолиш. Ҳунармандлар шаҳарчасининг умумий майдони – 9 минг квадрат метрга яқин. Буюк Ипак йўли бўйида жойлашган шаҳар марказида қад ростлайдиган янги шаҳарчанинг лойиҳаси ўзгача. Келгусида бу ерда тадбиркорларни қўллаб-қувватлаш орқали янги иш ўринлари очиш, сайёҳликни ривожлантириш кўзда тутилган.

Вилоят ҳокими иншоотларнинг барчасида Шарқ ҳамда миллий меъморчилик нақшлари тасвирланиши ва янги иншоотларни вақтида фойдаланишга топшириш зарурлигини таъкидлади.

Мажлисда шаҳардаги галерея лойиҳаси, бизнес марказининг ташқи қиёфаси, миллий ўйинлар майдони лойиҳаларига киритиладиган ўзгартиришлар қўллаб-қувватланди.