Буюк Британиянинг Қозоғистондаги элчиси Кэти Лич ва Халқаро миграция ташкилоти раҳбари Серхан Актопрак Туркистонга ташриф буюрди.

Вилоят ҳокими Дархан Сатибалди билан учрашувда қатор масалалар атрофлича муҳокама қилинди.

Буюк Британия ҳукуматининг молиявий кўмагида Халқаро миграция ташкилоти Меҳнат сафарбарлиги маркази салоҳиятини оширишга ёрдам бермоқда. Буни изоҳлар экан, Буюк Британиянинг Қозоғистондаги элчиси Кэти Туркистон вилояти салоҳиятини юксак баҳолади. Ушбу марказ Буюк Британияда ишлаш ниятида бўлган фуқароларга ҳар томонлама ёрдам беради.

Халқаро миграция ташкилотининг Қозоғистондаги хизмати раҳбари, Марказий Осиё бўйича мувофиқлаштирувчи Серхан Актопракнинг айтишича, бундай марказ миграцияга тайёргарлик кўришда улкан аҳамиятга эга. Унинг қайд этишича, марказда меҳнат муҳожирлари янги муҳитга тез мослашиб, зарур маълумотларни олдиндан олади.

Қайд этиш жоизки, меҳмонлар маҳаллий фуқароларни хорижий давлатларга ишлашга жўнатиш мақсадида ташкил этилган “Дастлабки ўқув маркази”нинг очилиш маросимида иштирок этди. Шу билан бирга, марказ фаолияти билан яқиндан танишиб, хорижда ишлаш ниятида бўлган фуқаролар билан фикр алмашди.

 Туркистондаги “Меҳнат сафарбарлиги маркази” қошида очиладиган муассаса қозоғистонлик меҳнат муҳожирларига асосан маслаҳатлар беради.