Давлат раҳбари Ираклий Кобахидзени Грузия Бош вазири лавозимига қайта тайинлангани билан табриклади ва мамлакат тараққиёти йўлидаги масъулиятли фаолиятига муваффақиятлар тилади.

Қасим-Жўмарт Тўқаев Қозоғистон – Грузия муносабатларини юксак баҳолади. Президентнинг сўзларига кўра, Грузия Қозоғистоннинг Кавказ минтақасидаги ишончли ҳамкори. Икки давлатни ўзаро дўстлик ва яқин тарихий илдизлар боғлаб туради.

– Қозоғистон ва Грузия ўртасида турли даражаларда, хусусан, парламентлараро ва ҳукуматлараро самарали ҳамкорлик йўлга қўйилган, – деди Давлат раҳбари.

Грузия Бош вазири Ираклий Кобахидзенинг сўзларига кўра, Грузия Қозоғистон билан кўп қиррали ҳамкорликни мустаҳкамлашга алоҳида эътибор қаратади.

– Грузия Қозоғистоннинг замонавий ташқи сиёсий стратегияси доирасида халқаро майдонда ташлаётган дадил амалий қадамларини ҳар томонлама қўллаб-қувватлайди ва хайрихохлик билдиради. Сиёсий ва иқтисодий ҳамкорликни кенгайтириш биз учун жуда муҳим. Биз Қозоғистон манфаатларини турли шаклларда, жумладан, халқаро майдонларда фаол ҳимоя қилишга тайёрмиз. Бугунги кунда ўзаро ҳамкорлик ривожига асосий туртки бераётган муҳим омил сифатида икки мамлакат етакчилари ўртасидаги дўстона алоқалар, мунтазамлик касб этаётган учрашувлар, самимий мулоқотларни эътироф этиш лозим, – деди у.

Қ. Тўқаев ва Ираклий Кобахидзе Транскаспий халқаро транспорт йўналиши бўйлаб юк ташиш ҳажмини ошириш ва транзит йўлаги инфратузилмасини замонавийлаштиришга алоҳида эътибор қаратди.

– Мамлакатимиз иқтисодиётини замонавийлаштириш ва уни дунё миқёсидаги рақобатбардошлигини ошириш мақсадлари ташқи ҳамкорлар билан саноат кооперацияси йўналишидаги ҳамкорликни кучайтириш, ривожланган мамлакатлар тажрибасини ўрганиш, ташқи сармоялар ва юқори технологияларни кенг кўламда жалб этишни талаб этмоқда. Шу маънода, Қозоғистон ва Грузия иқтисодий тараққиёт стратегиялари бир неча муҳим соҳаларда бир-бирини тўлдириш қобилиятига эга эканлигини таъкидлаб ўтиш лозим.

Учрашувда савдо, энергетика, сармоя, сайёҳлик, сунъий заковат ва рақамлаштириш каби кўплаб йўналишларда икки томонлама муносабатларни кенгайтириш истиқболлари кўриб чиқилди. Шунингдек, халқаро кун тартиби ва минтақавий хавфсизликнинг долзарб масалалари муҳокама қилинди.