Шу кунларда Шимкент шаҳри кўчаларида юрган сайрамлик Пайзаҳмат Зиёматовнинг “Победа” русумли автомашинаси кўпчиликнинг диққат-эътиборида. Бунга сабаб, автоуловнинг Буюк Ғалабанинг 80 йиллигига мос руҳда безантирилганида.

Касбкори бўйича қурувчи Пайзаҳмат ака анча йиллардан буён эски автоуловлар йиғиш билан шуғулланади. У “Чимкентстройдеталь” ИЧБ, “Южводстрой” трестида хизмат қилган. Мустақиллик йилларида эса тадбиркорлик билан шуғулланиб, “Қайнар”, “Бытие-2”, “Искра” МЧБларнинг директори сифатида фаолият кўрсатган.

– Автоуловимга Совет Иттифоқи Қаҳрамонлари З. Ҳусанов ва Б. Содиқов, шунингдек, машҳур генерал С. Раҳимов, УВУда иштирок этган ҳамюртларим Н. Йўлдошев, Ҳ. Тўйчиев, А. Мўминжонов, Д. Мўминшиқов, падари бузрукворим Ортиқмат Зиёматовларнинг портретлари илинган, – дейди у. – Улар Улуғ Ватан урушида қаҳрамонлик кўрсатиб, бугунги тинчлик замонларни бизга туҳфа қилганлар сирасидан. Оталаримизнинг жасоратини унутмаслигимиз керак. Уларнинг умр йўли ва жасоратидан ҳамиша фахрланамиз. 

П. Зиёматовнинг ушбу ташаббуси ватанпарварликнинг оддий бир кўриниши бўлса-да, барчага ибратдир.