Сўзоқ тумани Чўлоққўрғон қишлоғида истиқомат қилувчи кўп болали она Гулнара Жуманбаеванинг шу пайтгача ўз уйи бўлмаган. 4 фарзандни вояга етказаётган аёл ижарада яшашга мажбур эди. Исмини айтишни истамаган сахий тадбиркор Г. Жуманбаеванинг оиласига беш хонали уй ҳадя қилди. Туман ҳокими Мухит Турисбеков уй тўйи билан қутлаб, Гулнара Жуманбаевага бошпана калитини топширди.
– Туркистон вилояти ҳокими Ўмирзақ Естайули ташаббуси билан вилоятимизда “Қамқорлық” лойиҳаси йўлга қўйилган. Олиб борилган ишлар натижасида туманимизда ёрдамга муҳтож 32 оила аниқланди. Моддий жиҳатдан қийналаётган ночор оилаларга озиқ-овқат, кўмир ва бошқа ёрдамлар кўрсатилмоқда. Исмини ошкора этишни истамаган тадбиркорга миннатдорчилик билдирамиз, – деди туман ҳокими.
– Шароитимизни тўғри баҳолаб, бошпана сийлаган тадбиркорга оиламиз номидан миннатдорчилик билдирамиз. Қувончимиз чексиз. Ҳамма бахтиёр яшашга лойиқ, – деди кўз ёшини тиёлмаган Гулнара Жуманбаева.
Уй тўйида туман фахрийлар кенгаши раиси Қабилбек Еспенбетов, қишлоқ имоми Мейирбек Қалдибеков ва қўшнилар эзгу тилакларини билдиришди.
Шуни таъкидлаш жоизки, уй туман марказида жойлашган бўлиб, коммунал хизматларга қўшилган, томорқаси ҳам бор. Ушбу лойиҳа доирасида Сўзоқ туманида 9та оила бошпанали бўлганлиги таҳсинга лойиқ.