Жорий йилнинг сентябрь ойида Оқсувкент-2 қишлоғида 100 болага мўлжалланган “Agsu Education” хусусий бошланғич мактаби очилади.

Ушбу таълим муассасасининг галдаги режалари билан Сайрам тумани ҳокими Уласбек Садибеков танишиб, болалар учун қулай шароитлар яратиш, сифатли таълим-тарбия беришга эътибор қаратиш зарурлигини таъкидлади.

Янги ўқув йилидан бошлаб  мактаб жамоасини Гулсим  Сарсенбай қизи Тўлепбергенова бошқаради.

Хусусий мактабда болалар давлат тилида ўқитилади. Ўқувчилар иссиқ таом билан таъминланади, узайтирилган кун гуруҳи, турли тўгараклар фаолияти, самарали ўқитиш усуллари кўзда тутилган. Мазкур иншоот тадбиркорнинг ҳисобидан (150 млн. тенге) қайта таъмирланиб, жиҳозланди. 

Таълим муассасасига 20дан зиёд тажрибали ва малакали ўқитувчилар қабул қилинди. Мактабда 0-4-синф ўқувчилари математика ва логика, инглиз тили, ҳуснихат, тез ўқиш, тасвирий санъатдан сабоқ олишади. Шунингдек, болалар дўмбира, хореография, шаҳмат, тўққизқумалоқ тўгаракларида шуғулланишлари мумкин. Мақсад – болаларнинг бўш вақтини самарали ўтказиш, маҳоратини ошириш.

Келгусида мактаб ўқувчиларини ташиш йўлга қўйилади.