Сўнгги йилларда Ўзбекистон ва Қозоғистон давлатлари орасида ўзаро ҳамкорлик муносабатлари тобора мустаҳкамланмоқда. Жумладан, таълим муассасаларининг ҳамкорлигини ривожлантиришга алоҳида эътибор қаратилмоқда. 

Яқинда Шимкент шаҳридаги “Сайрам” тиббиёт коллежи вакиллари Ўзбекистон Республикасининг Бухоро шаҳридаги “Бухоро” халқаро тиббиёт техникуми ва Афшона шаҳридаги Абу Али ибн Сино номидаги Жамоат саломатлиги техникумига ташриф буюришди. Сафардан мақсад – замонавий меҳнат бозорида талаб қилинадиган кадрларни тайёрлаш, қўшма ўқув дастурларини амалга ошириш бўйича самарали ҳамкорликни йўлга қўйиш эди. 

– Делегация таркибида талабаларимиз ҳам бор эди, – дейди коллеж директорининг ўринбосари Баҳодир Акромшиқов. – Ташриф давомида Бухоронинг диққатга сазовор масканларида бўлдик, тарихий обидаларни, жумладан, Абу Али ибн Сино музейини кўздан кечирдик. Таълим муассасаларида дарс жараёнларини кузатиб, уларнинг моддий-техника базаси билан яқиндан танишдик.

Сафар давомида ҳар икки муассаса билан ҳамкорлик меморандумлари имзоланди.