Туркистон шаҳрида ёш ишбилармонлардан иборат «Ёш тадбиркорлар клуби» фаолиятини бошлади. Клубнинг дастлабки йиғилишида вилоят тадбиркорлар палатаси директори муовини Ербўл Ауелбеков, Туркистон шаҳри ҳокими ўринбосари Мекенхан Қириқбаев ҳамда маънавий пойтахтнинг фаол тадбиркорлари иштирок этди.

Клубнинг асосий мақсади – тадбиркорлик ташаббуси билан чиққан ёшлар билан учрашиш, улар ўртасида тадбиркорликни тарғиб қилиш ва қўллаб-қувватлаш, давлат ва жамоат тузилмалари ўртасидаги ҳамкорликни мувофиқлаштириш. Унинг аъзолари бўлғуси масалаларни ижобий ҳал этиш ва тадбиркорлик соҳасини ривожлантиришда фаол иштирок этишга келишиб олишди.

– Минтақадаги 200 000дан зиёд тадбиркорнинг 70 000га яқини 35 ёшга тўлмаган ёшлардир. Ёш тадбиркорлар улуши салмоқли бўлгани туфайли, турфа масала ва таклифлар ҳам етарли бўлади. Шу ва бошқа ҳолатларни ҳисобга олиб, «Ёш тадбиркорлар клуби»ни ташкил этишга қарор қилдик, – деди Ербўл Асфандиярули.

Учрашувда шаҳар раҳбарининг муовини Мекенхан Қўзиханули туркий оламнинг сайёҳлик маркази бўлган Туркистон шаҳри номига муносиб бўлиши учун тадбиркорлар алоҳида аҳамиятга эга эканлигини таъкидлади. Шунингдек, у ёш тадбиркорлар фаолиятини оммалаштириш учун телеканал ҳамда газета ва журналларда ёритиш масалаларига алоҳида эътибор қаратиш лозимлигини айтиб ўтди.