Туркистонда тўрт ой мобайнида минтақавий санъат фестивали ўтказилади. Бу ҳақда Туркистон вилоят Маданият ва туризм бошқармаси бошлиғи Муқағали Кенжетайули маълум қилди.

Санъат байрами апрелдан июлгача ҳар жума, шанба ва якшанба кунлари Туркистон шаҳрида ўтказилади.

– “Санъат ўлкаси” вилоят санъат фестивалининг тантанали очилиш маросими 7 апрель куни Туркистон шаҳридаги “Карвон сарой” мажмуаси ҳудудида ўтди. Туман ва шаҳарларнинг бадиий жамоалари олдиндан тасдиқланган жадвал асосида ўз санъатини намойиш этади. Фестивал пардасини биринчи бўлиб Сайрам тумани санъаткорлари очди. Фестиваль 4 ойга мўлжалланган. У ерда шунингдек, мусаввир ва ҳунармандлар эришган ютуқлар, туман ва шаҳар ютуқларига бағишланган кўргазмалар ташкил этилмоқда. Мўйқалам усталари ва ҳунармандлар иштирокида рангтасвир ва ҳунармандчилик ишлари намойиш этилади. Бундан ташқари, миллий анъаналар ва урф-одатларга оид саҳна кўринишлари ҳам намойиш этилади, – деди бошқарма раҳбари.

Фестиваль якунларига кўра энг яхши деб топилган бадиий жамоалар ва хонандалар иштирокида катта концерт ташкил этилиб, ғолиблар тақдирланади.