Вилоят “Ёшлар имконият маркази” ташкилотчилигида UFCнинг ярим ўрта вазн тоифасидаги жангчиси, аралаш жангларда енгилмаётган спортчи Шавкат Рахмонов ёшлар билан учрашди. Туркистон шаҳрида ўтган ушбу учрашувдан кўзланган мақсад – ёш авлодга маърифий-маънавий йўл-йўриқ кўрсатиш эди. Таниқли спортчи ўз тажрибаси билан ўртоқлашар экан, ўрганган машқларини кўча-куйда эмас, балки мамлакатимиз байроғини сарбаланд этиш учун қўллаш зарурлигини таъкидлади.

– Мен сизга қараб куч-қувват оламан. Сиз билан зўрман, кучлиман. Ҳар бир жўшқин, навқирон йигит, аввало, ўз-ўзини енга олиши керак. Ҳар бир ёш спортчи машғулотларга ҳормай-толмай қатнашиб, биргаликда юрт шаънини ҳимоя қилиш ҳақида ўйлашимиз керак. Кимда ким ўзидаги ялқовликни енга олса, демак, улкан муваффақиятларга эришиши тайин,– деди Ш. Рахмонов.

Суҳбат асносида у ёшларни қизиқтирган саволларга жавоб берди. Уларни соғлом турмуш тарзига амал қилишга, ватанпарварликка ҳамда эл-юртга фойдаси тегадиган ишлар билан машғул бўлишга чақирди. Шунингдек, ўз ҳаёти давомида бошидан кечирган қизиқарли воқеа-ҳодисалардан ҳам гапириб, ёшларда кучли таассурот қолдирди.

Учрашувда жажжи болажонларнинг тушовкесди маросимида иштирок этди ва тадбир иштирокчиларига миннатдорчилик билдирди.

Ўз навбатида туркистонликлар ҳам азиз меҳмоннинг кифтига зарбоф тўн ёпиб, тулпор ва эсдалик совғаларини тақдим этишди.