Манкент қишлоқ кутубхонаси ташаббуси билан маданият уйида 1 июнь – Халқаро болаларни ҳимоя қилиш кунига бағишлаб “Эртаклар оқшоми” ўтказилди. Байрам тадбирида имконияти чекланган болалар иштирок этишди. Уйда таълим оладиган бундай болаларнинг жамият эътиборидан четда эканликларини англатиш ва ҳаётига ижобий ўзгариш киритиш оддий орзулари рўёби тадбирнинг бош мақсади.

Байрам тадбирини Сайрам туман маслаҳати депутати Шамҳат Холмуродов очиб, Манкент қишлоқ округи ҳокимининг ўринбосари Шавкат Сиддиқов, Сайрам туман бандлик ва ижтимоий дастурлар бўлимининг “Уйда ижтимоий хизмат кўрсатиш” ДКК бўлим мудираси Куляш Дўсқараева болаларни табриклаб, эзгу ниятларини изҳор этишди. Сайрам туман маслаҳати депутати Мунаввар Убайдуллаева ва Манкент қишлоғи “Оналар кенгаши”нинг раисаси Сайёра Довонова ҳомийлигида 66 нафар имконияти чекланган болага совғалар топширилди.

Тадбирда алоҳида парваришталаб болалар ижодларидан намуналар намойиш этилиб, байрамга файз бағишлашди. Шу билан бирга кутубхонанинг фаол китобхонлари жонли овозда қўшиқ куйлаб, рақслар ижро этишди. Тадбирда иштирок этаётган ота-оналар тадбирни уюштиришда бош-қош бўлган ижтимоий соҳа ходимлари ва депутатларга миннатдорчилик изҳор этишди.

Қишлоқ кутубхонаси ходимаси Азиза Султонқулова “Эртаклар оламида” мавзуидаги китоб кўргазмасини китобхонлар эътиборига ҳавола қилди. 

– Мактаб ўқувчилари иштирокида кўплаб тадбирлар ўтказиб турамиз. Шу билан бирга имконияти чекланган болаларни ҳам эътибордан четда қолдирмаймиз. Болаларни ҳимоя қилиш куни ажойиб байрамлардан бири. Бу куни ҳар бири бола ўзининг жамиятга ҳақиқатан ҳам керак эканлигини ҳис этиши керак, – дейди А. Султонқулова.